Абай елі

Абай елі

Бейсенбі, 30 Наурыз 2017 00:00

РЕСПУБЛИКА САХНАСЫНДА ТОП ЖАРДЫ

Өнер байқауында

 

 

Осыдан біраз бұрын Алматы қаласындағы Құрманғазы атындағы оркестрдің ғимаратында «Мереке» балалар мен жасөспірімдер продюсерлік орталығы 8-наурыз Халықаралық әйелдер мерекесіне орай «Аналар-асыл жандар» атты Республикалық ән-би байқауын өткізген болатын. Аталмыш өнер додасына ауданымыздан Ш.Әбенов атындағы жалпы білім беретін мектептің өнерпаз оқушылары қатысып, жүлделі орынмен оралды. 

Аталмыш байқау аналар мен ару қыздар тақырыбы аясында кеңінен ізденуге жол ашу арқылы ізденімпаздыққа баулып, әйел затын құрметтеуге шақыру, ақын-жазушылардың, композиторларлардың аналар мен қыз-келіншектер тақырыбындағы туындыларын қайта жандандыру, асыл жандарға арнау өлең оқып, ән салғызу арқылы балалар мен жасөспірімдердің өнерге сүйіспеншілігін арттыру мақсатында ұйымдастырылды.

Өнер сыны «Эстрадалық вокал», «Көркем сөз», «Аспапта ойнау», «Хореография», «Бейнелеу өнері», «Қолөнер» жанрлары бойынша өткізілген еді. Солардың ішінде «Көркем сөз» жанры бойынша бақ сынаған жерлес өреніміз Серікқалиұлы Қайсар Бас жүлдені жеңіп алса, Секенова Жадыра 1 орынды иеленді. Бұл оқушылырға жетекшілік еткен қазақ тілі мен әдебиеті пәнінің мұғалімі, жас ұстаз Тәжмұхаметова Айсәуле де марапаттан кенде болған жоқ. Ол жас ұрпақты өнерге баулып, салауатты өмір салтын насихаттауға қосқан үлесі, Республикалық «Аналар-Асыл жандар» жасөспірімдер мен балалар шығармашылық байқауына сіңірген еңбегі үшін Алғыс хатпен марапатталды.

Жалпы, аталмыш байқауға қазылық еткен актер, режиссер, Т.Жүргенов атындағы өнер академиясының оқытушысы Талғат Көбеков, «Аналар-асыл жандар» байқауының авторы, ұйымдастырушысы, ұстаз Смайлова Мереке және қазақ радиосының журналисі Гүлмира Нәлібай абайлық өрендер өнерлерін аса жоғары бағалапты. Жеңімпаз жас өнер иелеріне алдағы уақыттарда да жетістіктер тілейміз.

 Анар ҚАБДУӘЛИҚЫЗЫ,

«Абай елі»

Бейсенбі, 30 Наурыз 2017 00:00

АУЫЛЫ БАЛУАН ҰЛЫН АРДАҚТАДЫ

Азаматқа  құрмет

                                         

                                      

Ежелден мәдениет пен өнердің туын биік ұстап, тау тұлғалары мен саңлақтарын  ардақтай білетін  Шыңғыстау төрінде дүбірлі додалар толастаған емес.  Соның бір айғағы, Көкбай ауылы дүркіретіп той өткізіп, ұлан-асыр ас беріп, мерекелік шараларды өз мәнінде өткізіп  жататын берекелі, ынтымақты ауыл. Жақында, 8 наурыз күні  мерейлі тойдың құрметіне орай өткізілген осындай айтулы шараның куәсі болдық.

                        Көптің назары Көкбайда

Мәдениет үйінің кең залында халық мол жиналыпты. Ине шаншарға орын жоқ. «Ауылына қарап азаматын таны» дегендей, Көкбай ауылының тайлы-таяғы қалмай жиылған  кең залды  той иесі Нұрлан Әзімбаевтың алыстан ат арытып келген ет жақын туыстары мен қоса дос –жарандары, шәкірттері де толықтырыпты. «Сүйер ұлың болса сен сүй, сүйінерге жарар ол» демекші, осынау дүбірлі шара иесінің  ауыл үшін қаншалықты қадірлі  тұлға екендігін осыдан-ақ шамалай беріңіз.

 Бұл күні  Көкбай ауылындағы көптеген көкөрімдердің спортшы болсам деген ақ арманына желкен, талпынысына түрткі болған ауыл азаматы, еңселі 50 жасты еңсеріп отырған, қазақ күресінен спорт шебері, білікті бапкер, ұстаз Әзімбаев  Нұрлан Мәнәуұлы атында қазақ күресінен турнир  ұйымдастырылып өткізілді. Жарыстың жоғары деңгейде өтуіне мұрындық болған спорт мектебінің қазақ күресінен І-дәрежелі жаттықтырушысы, турнир иесінің шәкірті  Думан Шәкебайұлының  ұйымдастыру барысындағы тындырымды еңбегін айта кеткен жөн көрдік.  

Тұңғыш рет қолға алынып отырған аудан көлеміндегі осынау додаға Нұрлан Мәнәуұлының абыройын асқақтатып, жер-жерден қаншама айтулы азаматтар шақырылыпты. Ал, осынау әсем кешті жүргізуді мектептің ұстазы Жанар  Мұқажанова қолға алыпты.  

Ежелден өнерге бай Көкбай жері ән мен жырдан әсте  кенде емес. Той иесіне, ауылының  сүйікті ұлдарына арнап жыр маржанын төгілткен Балықбаев Сақан ағамыз бен Мейіз Тақанова ұстаз, әсем әннен сыбаға тартқан Асқар Мұсамағамбетов, қазақы дәстүрмен шашу шашқан Қадырова Айтбүбі ұстаз да  ата салттың қадірін білген парасатты жандар екендіктерін көрсетті.   

Осылайша, еліміздің Әнұраны аспандаған сәт те туып, ортаға осы жарыстың бас төрешісі, Қазақстан Республикасының құрметті спорт қайраткері, Қазақ күресінен жоғарғы дәрежедегі төреші Төлеубаев Бейсен Абдрахманұлы бастаған жарыс төрешілері мен жарысқа қатысушы палуандар шақырылып, салтанатпен халыққа таныстырылды. Бұл ретте айтпағымыз, осынау жарыстың  басы-қасында басқарып жүрген  Бейсен ағаның алатын орны ерекше. Той - иесімен салтанатты. Дүбірлі доданың иесі, бақытты отбасының тірегі Нұрлан Мәнәуұлы зор құрметпен  жанұясымен  ортаға шақырылған соң  ауыл әкімі Шәріпқазы Санбайұлы мен  мен аудан орталығынан келген басшы азаматтар, аудандық білім бөлімінің бастығы Мақсат Нұрсұлтанұлы, аудандық спорт мектебінің директоры Қалиев Қуат Барысұлы ақжарма лебіздерін білдіріп, сый-сияпаттарын табыстады.

Әсіресе, кіл мықтылар жиналған жарысқа Шығыс Қазақстан облысы Қазақ күресі федерациясының вице президенті Амантай Қазымұлының келуі абайлықтар үшін биік мәртебе болды. Құрметті қонақтар қатарында ҚР құрметті спорт қайраткері, ҚР еңбегі сіңген жаттықтырушы Қоржыкенов Серік Сапаұлы, Қазақстанның бірнеше дүркін түйе палуаны, Абайдың 150 жылдық мерейтойының бас палуаны Оралбеков Жәнібек, ҚР еңбегі сіңген жаттықтырушы, Халықаралық дәрежедегі төреші Тұрсынов Шыңғыс Бейсенұлы, Әлем кубогының жеңімпазы, халықаралық дәрежедегі спорт шебері Шаймарданов Зекен, спорт шебері Сағымбеков Қайырбек,  Семей қаласындағы Медициналық Университеттің дене тәрбиесі кафедрасының меңгерушісі Мырзабосынов Ербол, той иесінің досы Сүлейменов Қанат, КСРО спорт шебері Тұрашев Дәулет, спорт шебері Оразалин Шаған, Жұмасиянов Бегалы, Семей педагогикалық институтында өзімен бірге қызмет жасаған әріптестері, жоғары дәрежедегі төреші Жармұханбетов Қайрат, шығыстың шымыр ұлдары Айбек Нұғымаров пен Мұхит Тұрсыновтар арнайы келіпті. Сондай-ақ ауданның спорт ардагерлері, ауданның мәдениет, тілдерді дамыту, дене шынықтыру және спорт бөлімінің бастығы Еркебұлан Сағындықов бастаған мамандар,  Нұрлан Мәнәуұлының шәкірттері Жакупов Серік, Бекілов Қуаныш та бар. Осы ауылдың тумалары Юзат Шахантаев, Әлімбеков Тілеш, Ығылманов Самалбек тағы бірқатар азаматтар Әзімбаев Нұрланның қуанышына ортақтаса келіпті.  

                                                              Өмір өрнектері

Жарысқа әр ауылдан жиыны 176 бала қатысты. Боз кілемде белдескен жас балуандар осындай тәлімі мол шарадан патриоттық рух алатыны хақ. Алдыңғы толқын ағаларына ұқсап баққан шымыр ұландардың кімнің жүлдесі үшін өткізіліп жатқан дода екендігіне де аса мән бере қарап, қалайда жеңіске жетсем деген құлшынысы арта түссе, жеңімпаз болған уақытта кеудесін қуаныш кернеп, кейін өсе келе «мына бір медальды Көкбай ауылының тумасы, қазақ күресінен спорт шебері, ұстаз Әзімбаев Нұрлан ағаның 50 жасына орай өткізілген жарыста алдым» деп масаттана айтпасына кім кепіл?! Міне, осыдан барып ауылдан шыққан  спортшы  азаматқа деген ыстық ықылас, ниет, құрмет туындамай ма?   Иә, біз білетін Нұрлан Мәнәуұлы жайлы айтып өтсек артық болмас дейміз. Әзімбаев Нұрлан Мәнәуұлы 1967 жылы 8 наурызда осы Мұқыр ауылында дүниеге келген. 1974 жылы мектеп табалдырығын аттап, 1984 жылы тәмамдады. Нұрланның ұлттық спортқа деген қызғушылығы міне, осы тұста  17 жасында басталған. Сол жылы Семей педагогикалық институтының дене тәрбиесі факультетіне оқуға түсіп, 1990 жылы бітіріп шықты. Арасында 1986-1988 жылдары кеңес әскері қатарында болып өзінің азаматтық борышын өтеп қайтты.

Ал спорт әлеміндегі өзіндік өрнегі тіптен ерекше. Алғаш Көлембай Әлімбековтің тәрбиесінде болып 1982-1983 жылдары бокстан аудандық жарыстардың жүлдегері атанды. 1985-1986 жылдан бастап қазақ күресі және самбомен айналыса бастайды. Соның нәтижесінде қазақша күрестен аудандық, облыстық жарыстардың жеңімпазы атанады. 1986 жылы Жастар арасындағы самбодан Шымкент қаласында өткен Қазақстан жастар біріншілігінде 2-ші орын алып, спорт шеберлігіне  кандидат болды. Ал 1991 жылы Жақия Шайжүнісов атындағы турнирде 2-ші орын иеленіп, спорт шеберлігін қорғады. Ең бірінші Қазақстанның спорт шебері атағын жеңіп алды.

Сонымен қатар, 1993 жылы Мамай атамыздың 300 жылдық мерейтойында өгіз палуан атанды. Еңбек жолын Семей қаласындағы спорт мектебінде самбо күресінен жаттықтырушы болып бастаған. 2002 жылы өзінің туып-өскен жері Көкбай ауылында дене тәрбиесі мұғалімі және жаттықтырушы болып қызметін жалғастырады. Шәкірт тәрбиелеп, жас ұрпақты спортқа баулыды. Шәкірті Сағымбеков Қайырбек самбодан, қазақша күрестен спорт шебері атанды. Облыстық жарыстардың, Қазақстан чемпионаттарының жеңімпазы. «Ұстаздан шәкірт озар деген» осы емес пе?! Нұрлан Әзімбаевтың көптеген шәкірттері бүгінде  ұстаз жолын жалғастырып, еліне елеулі қызмет атқарып жүр. Ұстаз жемісі - шәкірт жеңісі екені хақ. Өзі тәрбиелеген шәкірттерін мақтан тұтатын ұстаз мерейі қашанда нұрлы. Бізге берген сұхбатында Жакупов Серік, Байғұрманов Досжан, Мұратов Қуаныш, Акемев Шыңғыс, Ылдыбаев Қуат, Шәкерғалиев Біржан, Садықов Нұрлан, Біржан сынды  шәкірттерінің атын тізбелеген ұстаз бүгінде олардың жеткен жетістіктеріне қуанып, өзінің жемісін, маңдай тер еңбегін сезінгендей.

Десекте, ағамыз көпке дейін спорттан қол үзген жоқ. Мәселен, 2008 жылы Қостанай қаласында ардагерлер арасында қазақша күрестен Қазақстан спартакиадасында қола медальды жеңіп алады.  2010 жылға дейін Семей педагогикалық институтында дене тәрбиесі кафедрасында аға оқытушы болып абыройлы  қызмет атқарған ол бүгінде денсаулығына байланысты  үйде, Семей қаласында тұрады.

Қашанда сағынып келгенде  құшағын айқара ашатын туған ауылы, өзінің ісін жалғар қаншама ізбасар  шәкірттері, қиналғанда да қуанышта да әрдайым қасынан табылатын жан жары, әкелейтін ұрпағы, қолтығынан демейтін туған-туыстары, сыйлас дос-жарандары бар 50 жасты еңсеріп отырған Нұрлан Әзімбаевты бақытты жан десек те болады. Жары Гүлнара Семей қаласындағы №32 орта мектебінде физика пәнінің мұғалімі. «Әке - асқар тау, ана-жағасындағы бұлақ, бала - бейкейдегі құрақ» демей ме, жары екеуі үш баланы аялап, бағып өсірді. Үлкен қыздары Еркежан тұрмыста. Алматы қаласында психолог маманы. Одан кейінгі қызы Аяулы Алматыда спорт және туризм академиясының ІІ-курс студенті, кенжелері Серікбек атты ұлдары Алматыда Әл-Фараби атындағы Қазақ Ұлттық университетінің І-курс студенті.

«Жігітке жетпіс жеті өнер де аз» демекші, Нұрлан ағамыз спортқа да өнерге де жақын. Домбыра, гитара аспабын еркін меңгергендігін, шебер ойнайтынын да байқадық.     

                                             «Күш атасын танымас»

 Қазақ күресінен спорт шебері, ұстаз Әзімбаев Нұрлан Мәнәуұлының атындағы турнирге жиыны әр ауылдан келген, жалпы саны 176 палуан бақ сынады. Ұлттық спорттың жанашырлары да, жанкүйерлері де осы ауылдан табылды. Боз кілемде 23 келі салмақтан бастап 73 келі салмақтан жоғарыға дейінгі палуандар күш сынасты. Әсіресе, спортқа деген ынтасы зор талапты кішкентай  ұландардың әдіс-тәсілдері дүйім жұртты тәнті етті. 

Той иесі Нұрлан Әзімбаевтың  өзі  де  спортқа бала кезден әуес болыпты. 7 жасынан коньки теуіп өскен ауыл баласы 4 сынып оқып жүргенде допты хоккейден өткен аудандық жарыста «Үздік шабуылшы» атанып, Мақтау қағазымен маратталған. Ал 8-9 сыныпта бокстан өткен жарыста да жеңімпаз атанған ол боз кілемдегі белдесуден балалық шаққа бір сәт саяхат жасап, спортқа даңғыл  жол балалық кезден бастау алатынын  алға тартты. Осылайша, таңертеңнен кешқұрымға созылған дүбірлі дода нәтижелі жеңістермен тәмамдалды.

Жарыс қорытындысы бойынша жеңіс тұғырынан табылған тоқсаннан астам  палуанның аты-жөндерін бір мақалаға сыйғызу мүмкін болмағандықтан, жүлделі І орынды иеленген жеңімпаздарды ғана атап өткенді жөн көрдік.

Сонымен, 2005-2007 жылы туған жас палуандар  арасында 23 келі салмақ дәрежесі бойынша І орынды Абай мектеп-лицейінің оқушысы Медетбеков Елнұр иеленсе, 26 келі салмақ бойынша Көкбай орта мектебінің оқушысы Ә. Жұмахунов, 29 келі салмақ дәрежесі бойынша Медеу орта мектебінен Б. Сүлейменов, 32 келі салмақта көкбайлық Ұ.Абзалұлы, 35 келі салмақта көкбайлық   Л.Амантаев, 38 келі салмақта  Қарауыл гимназиясының оқушысы Б.Бауыржанов, 42 келі салмақта Абай  мектеп-лицейінің оқушысы Б.Мақсұтов І орынды қанжығаларына байлады. Ал,  2002-2004 жылы туған  15-17 жастағы палуандар  арасында 29 келі салмақ дәрежесінде І орын  иеленген  Көкбай орта мектебінің оқушысы Е.Тілеуғалиұлы жеңімпаз атанса, 32 келі салмақта Әуезов орта мектебінен А.Сайлауханов, 35 келі салмақта да қасқабұлақтық А.Айдынғали, 38 келі салмақта да Әуезов орта мектебінен Б.Төлеукиннің І орынды жеңіп алуы жақсы дайындықпен келгендіктерін аңғартты. 42 салмақта І орынды лицейлік Қ.Рахатұлы, 46 келі салмақта І орынды көкбайлық Е.Ерланұлы, 50 келі салмақта Іорынды Е.Орынбеков, 55 келі салмақта Бекбосынов орта мектебінен  Е.Қанатбекұлы, 60 келі салмақ бойынша М.Әуезов орта мектебінен М.Шалабаев, 66 келі салмақ бойынша көкбайлық Ж.Манарбекұлы  жеңіске жетті.  1999-2001жылы туған жасөспірімдер арасындағы белдесу тартысқа толы өтті десек, нәтижесінде 46 келі салмақ дәрежесінде Абай мектеп-лицейінің оқушысы А.Кәкітаев айқын басымдықпен  І орынды қоржынана салды. 50 келі салмақ дәрежесі бойынша Молдағалиев атындағы орта мектептен Д.Мұхамедияров, 55 келі салмақ бойынша лицейлік Д.Кеңесбекұлы, 60 келілік  салмақ бойынша  Тоқжігітов орта мектебінен Н.Төлеутаев, 66 келі салмақ дәрежесі бойынша Абай атындағы мектеп-лицейден Е.Жақсыбеков, 73 келі салмақтан жоғары салмақ бойынша Көкбай орта мектебінен Қ.Амантаев І орынды айқын басымдықпен, әдіс-айласының тиімділігімен жеңіп алды. Жоғары салмақта белдескен палуандар көкбайлық  Оспанов Ардақ, Толымхан Аслан, Қуанов Әділет епті де батыл, сенімді екендіктерін халық алдында паш етті.

Жігерлі жігіттердің арасынан суырылып шыққан Ардақ Оспанов оң нәтиже көрсетіп, «Түйе палуандыққа» қол жеткізді.

Осылайша, алысқанды алып ұратын апайтөс палуандар Көкбай елін ұлан-асыр дүбірге бөлеп, жанкүйер қауымның қуаныш пен шаттыққа ұластырды. Жарыстың жабылу салтанаты кешінде алтыннан алқа тағып, күміс пен қола медаль  иеленген барлық жеңімпаздарға бағалы сыйлықтар тарту етілді. Турнирге келген қонақтарға ақ дастарханын жайып, кеңпейіл қонақжайлылық көрсеткен барша туыстарына халық дән риза болды. Бір ауылдың намыс туын биіктетіп, азаматының атын асқақтатқан осындай дүбірлі доданың қолдаушысыз, демеушілерсіз өтпейтіні баршаға мәлім. Осы ретте  Нұрландай ер азаматқа қолдау көрсетіп, жарыстың өтуіне көмектескен  ауылдың  елуге тарта демеуші азаматтарына және ұстаздар қауымына ел атынан ризашылығымызды білдіреміз.

Осынау күннің шуақты сәттері талайға дейін абайлық көпшіліктің есінде сақталары анық. Ауданымызда жасөспірімдер арасында қазақ күресінен жарыстар жиі ұйымдастырылса, түбінде әлемге танымал палуандар шығатынына кәміл сенетін Нұрлан Әзімбаевтың  ұлттық спортқа деген көзқарасы осындай. Лайым, қуанышты күндер мол болғай!

 Анар СӘРСЕНБИНА,

Қарауыл-Көкбай-Қарауыл     

   

     

 

Бейсенбі, 30 Наурыз 2017 00:00

Ұлыстың ұлы күні некелері қиылды

 

Әз-Наурыз балғындардың да асыға, қуана күтетін мерекесі. Жанға шуақ сыйлайтын осынау мейрамға орай жуырда Абай аудандық  жұмыспен қамту және әлеуметтік бағдарламалар бөлімінің «Үйде арнаулы  әлеуметтік  қызметтер көрсету бөлімі» мүмкіндігі шектеулі балалар арасында «Бақ берекем мерекем-Әз Наурыз» атты тақырыпта ерекше кеш ұйымдастырды.

Осынау аталмыш шараға барша балақай мен олардың тәрбиешілері қызу даярлық жүргізіпті. Кештің әсерлі безендірілуі де ұлттық нақышқа сай болғандықтан тақырыпты ашып тұрды. Барша балалар мерекелік көңіл күйге енген болатын.

Әуелгі кезекте жүргізушілер Наурыз мерекесіне арналған мерекелік кіріспе сөз сөйлеп, шара барысын ашық деп жариялады. Әлбетте, атауы айтып тұрғандай Әз-Наурыз мерекесі ұлттық құндылықтарды ұлықтайтын мезет. Осынау үрдісті орынды пайдаланған тәрбиеленушілер қазақы салт-дәстүрлер бойынша сырға салу, құда түсу, келін түсіріп, неке қию жоралғыларын сахналады. Бұл көріністердің тағылымдық, тәрбиелік мәні зор болды. Ертеңгілік барысында «Үйде  арнаулы әлеуметтік  қызметтер көрсету бөлімінің» мүмкіндігі шектеулі балалар да, қызметкерлер де өз өнерлерін  ортаға салды. Мәселен, ұстаз бен шәкірт Абылқасымов Нұрлан мен Слямжанова Елдананың орындауында «Бүлдірген», «Егемен ел» әні орындалса, Әбеуова Амангүл «Қырманға кел, қалқатай!» әнін әсем дауыспен шарықтатты.

Мұнымен қатар, мерекелік кеш барысында әлеуметтік қызметкер Әбеуова Амангүл «Шақырады көктем» әнін әуелетті. Сондай-ақ, қызмет алушылар арасында жас жұбайлар Махтаев Айдос пен Толғанбаева Салтанаттың некелері қиылып, сырға салу, беташар, жар-жар сынды салт-дәстүрлер көрсетілді. Жастардың неке қию рәсіміне куәлік еткен Махтаева Бақытжамал және Қағазбеков Әлібек өз баталарын берді. «Құнанбай қажы» атындағы мешіт имамы Болат Самырбай жас жұбайларға арнайы неке куәлігін тапсырды.

Сонымен қатар, Қанағатова Айымгүл мен Ақылбекова Гүлім «Бәйге» биін биледі. Мерекелік кеште орындалған «Аққу» биі де көрерменді тәнтті етті. Кеш барысы қызықты әрі танымдық мағынаға бай болуы үшін келген қонақтар арасында қазақтың салт-дәстүріне байланысты сұрақ-жауап ойыны ұйымдастырылды.

Ал кеш соңында шараға қатысқан барша қызмет алушылар және келген қонақтар бірігіп «Қара жорға» биін биледі және жастарға ізі тілектерін жолдап, баталарын берді. Бұл орайда сөз алған «Үйде  арнаулы  әлеуметтік  қызметтер көрсету бөлімшесінің» меңгерушісі Қалдыбай  Венера Бейсенғазықызы қызмет алушыларды Наурыз мейрамымен құттықтап, балаларға  арнап жылы лебізін білдірді.

 Анар СӘРСЕНБИНА,

«Абай елі»

Бейсенбі, 30 Наурыз 2017 00:00

Бес ән мектебін бірдей шырқады

Бәрекелді!

Наурыз айының 15-17 күндері аралығында еліміздің батысындағы Атырау қаласында өткен «Ән дария дүлдүлдері» ән байқауында жерлесіміз, «Қаламқас» халықтық ән-би ансамблінің мүшесі Қайрат Қабышев жүлдемен оралды.

Бірнеше күнге созылған байқауға 18 бен 45 жас аралығындағы 48 үміткер, бүгінде дәстүрлі ән өнерінің жүйріктері қатысқан екен. Республика көлемін қамтыған додада Арқа, Сыр, Батыс Мұхит мақамы, Жетісу, Алтай-Тарбағатай ән мектептерінің нақ шеберлері бақ сынасқан екен. «Ән дария дүлдүлдері» конкурсы тұңғыш рет ұйымдастырылса да халықаралық «Шабыт» фестивалі, Әміре Қашаубаев атындағы ән байқауларымен деңгейлес өткендігін БАҚ кеңінен жазып жатыр. Ол туралы бірнеше республикалық, халықаралық байқаулардың жеңімпазы, «Ән дария дүлділдері» байқауының ІІІ орын иегері атанған Қайрат Қабышев:

-Бұл байқауға қатысқан себебім, мені қазақ дәстүрлі ән өнерінің асқақ бес бірдей мектебінің әндері шырқалатыны қызықтырды. Бесеуі де бес түрлі, бір-біріне ұқсамайтын, мақамы, нақышы, ән тартысы, тіпті заңдылықтары да өзгеше. Өзімді осы тұрғыдан сынап көргім келді. Байқауға қатысу үшін осы мектептердің әндерінен 25 әнді дайындап бардым-,дейді.

Редакция алқасы өнер иесін кезекті жетістігімен құттықтап, шығармашылық табыстар тілеп қайтты.

 

Нұржан БАЙТӨС,

«Абай елі»

 

Рухани  ынтымақтастық


 

 

Осыдан біраз бұрын, наурыз айының 7-10 күндері аралығында Египет Араб Республикасының астанасы Каир қаласында сауда-экономикалық, мәдени-гуманитарлық және ғылыми-техникалық ынтымақтастық бойынша Қазақстан-Египет үкіметаралық комиссиясының бесінші отырысы болып өтті. Халықаралық деңгейдегі маңызды кездесуге еліміздің делегациясын ҚР мәдениет және спорт министрі Арыстанбек Мұхамедиұлы бастап барды.

Ауқымды басқосу саналатын аталмыш үкіметаралық комиссия отырысында қос мемлекет арасындағы мәдениет және тарихи-мәдени мұраларды қорғау, спорт пен туризм, білім беру, діни қызмет, сауда, өндіріс, ауыл шаруашылығы, денсаулық сақтау т.б. салалар бойынша әріптестікті дамыту мәселелері қаралды.

Айта кетер болсақ, қазақстандық делегация құрамында еліміздің Дін істері және азаматтық қоғам вице-министрі Берік Арын, Мәдениет және спорт министрлігінің Мәдениет және өнер істері департаментінің директоры Алмаз Нұразхан, Тілдерді дамыту және қоғамдық-саяси жұмыс комитеті төрағасының орынбасары Ғалымжан Мельдешов, Денсаулық сақтау министрлігінің медициналық және фармацевтикалық қызметті бақылау комитетінің төрағасының міндетін атқарушы Пак Лариса Юн-Бойевна, ҚР Білім және ғылым министрлігінің Заң қызметі және халықаралық ынтымақтастық департаменті директорының орынбасары Ғалымжан Жұмашев, ШҚО Абай ауданы әкімінің орынбасары Бауыржан Тәттібеков, ҚР Сыртқы істер министрлігінің ІІ хатшысы Қожахмет Пазилов, Ұлттық кітапхана директоры Жанат Сейдуманов, «Астана Опера» театрының директоры Ғалым Ахмедьяровтар болды.

Кездесу барысында жүргізілген келіссөздер нәтижесінде Қазақстан-Египет үкіметаралық комиссиясы 5-отырысының хаттамасы жасалынып, қос тарап бірігіп қол қойыпты. Бұл аса маңызды құжатта екі ел арасындағы сауда-экономикалық, мәдени-гуманитарлық және ғылыми-техникалық ынтымақтастық мәселелерінн бірігіп іске асыру межеленген. Яғни, таяу болашақтағы іс-шаралар қатары пысықталыныпты.

Нақтырақ тоқталсақ, қос тарап «ЭКСПО-2017» халықаралық көрме аясында Ежелгі Египеттің өнер туындылары көрмесін өткізу мәселесі бойынша жұмыс жүргізбек. Бұдан өзге болашақта ҚР Ұлттық музейінде әлемдік мәдениет залын ашу үшін қазақстандық реставраторлар, археологтар Египетте даярлық курстарынан өтетін болады.

Осынау келелі басқосу аясында қос елдің мәдени бауырластығын арттыратын бірқатар игілікті шаралар да орын алды. Атап айтсақ, Арыстанбек Мұхамедиұлы Мысыр елінің  инвестициялар және халықаралық ынтымақтастық министрі Сахара Наср, мәдениет министрі Х. Наманам, Көнелер ісі министрі Х.Аль-Анани жән Каир шаһарының губернаторымен екіжақты кездесулер өткізіп, тарихи қаладағы «Достық пен еркіндік» саябағында орналасқан Абай бюстіне гүл шоқтарын қойды. Мұнымен қатар, ел делегациясы ұлы даланың ұлы тұлғасы Сұлтан Бейбарыс мешітін зиярат етті.

Осы орайда сонау Мысыр еліне арнайы ресми сапармен барып қайтқан Абай ауданы әкімің орынбасары Бауыржан Болатұлы өз әсерімен бөлісті.

-Естеріңізде болса, өткен жылдың қазан айында Мысыр төріне Абай ескерткіші қойылды деген сүйінші хабарды естіген едік. Төбеміз көкке бір елі ғана жетпей қалған болатын. Абайдың және оның әдеби мұрасының әлемдік деңгейде кеңінен насихатталуы күллі қазаққа мәртебе екенін көріп жүрміз. Сол себепті де, мені адамзат өркениетінің алғашқы алтын бесігі саналар осынау елдегі Абай ескерткішіне гүл шоғын қою сәті ерекше тебірентті. Жалпы, осы сапар барысында Египет Араб Республикасының Қазақстанға деген құрметі мен ерекше ықыласын танып қайттым. Тіпті олар, жас қала Астана мен іргетасы сонау перғауындар билігі заманында қаланған әйгілі Каир қаласын «Бауырлас қалалар» деп атайды екен, - деп атап өтті.

Жалпы, осынау екіжақты кездесулер қорытындысы бойынша Қазақстан мен Египет арасында бірқатар маңызды келісімдерге қол қойылыпты. Оның ішінде ҚР Ұлттық кітапханасы мен ЕАР Ұлттық кітапханасы және мұрағаты арасындағы ынтымақтастықты дамыту туралы меморандум, ҚР Дін істері және азаматтық қоғам министрлігі мен ЕАР Уақыфтар министрлігі арасында әріптестік орнату туралы меморандум қабылданыпты. Әйтседе, Ұлылар елі үшін, бүгінгі Абайшыл ұрпақ үшін хакім есімінің Мысыр төрінде ұлықталуы айтарлықтай қуанышты жаңалық екендігі хақ.

 

Нұржан БАЙТӨС,

«Абай елі»

Бейсенбі, 30 Наурыз 2017 00:00

РУХАНИ ҚАЗЫНАМЫЗ МОЛАЮДА

Кітапхана  әлемінде

 

 

         Кітап - адамзаттың сан ғасырлық ақыл-ойының алтын кені, тарихы мен тағылымының сыр сандығы. Құндылығы жоғары тарихи жинақтар мәдениет пен руханиятты сақтап қорғауда теңдесі жоқ құрал болып табылады. Әрдайым адам баласын ағартушылыққа бастап, сана төріне сәуле болып құйылып, көкірек көзін ашатын алтын қазына да кітап. Қала берді қалың-қалың қаттамалар бабалар мұрасының сарқылмас қоры. Кітап білімімізді молайтып, рухани ой-өрісімізді кеңейтіп, сөздік қорымызды байытып, таным-түсінігімізді дамытатын құндылық. Ал қазақ жазба әдебиетінің, ақыл-ойының кеніші саналатын Абай елі кітапты қастерлеу бойынша да алда келеді. Мәселен, сан алуан кітап қорымен бай, рухани ошақтардың бірі ауданымыздағы М.Әуезов атындағы орталықтандырылған кітапхана қоры жуырда тағы бір топ құнды қазынамен толықты.

Бабалар дәстүрі бойынша жыл басы саналатын ұлыстың ұлы күні Әз-Наурыз мерекесіне орай аудан орталығындағы кітапхана бөлімшесіне мол данамен түрлі тақырыптағы жинақтар тарту етілді. Атап айтсақ, жерлесіміз, бірқатар лауазымды қызметтерді абыроймен атқарып, бүгінде ҚР мәдениет және спорт министрінің жауапты хатшысы болып отырған ел ағасы Қуатжан Уәлиев абайлық оқырмандар үшін ерекше сый жасады. Әлбетте, бұл том-том жинақтардан тұратын тартуды халқымыздың қабырғалы жазушысы М.Әуезовтың 120 жылдығына орай, қаламгер есімін абыроймен алып жүрген мәдени мекемеге жасалған сый-құрмет деп білген абзал. Мұндай ыстық ілтипат кітап әлеміне жанашыр аудан тұрғындары тарапынан да жиі жасалатынын айтқан мекеме басшысы Рысбүбі Молдаханова бұл пікірімізді қуаттай түсті.

-Біздің мекемемізге жиі бас сұғатын оқырмандарға арнап кейбір қолы ашық, жомарт жандар өз үйлеріндегі жеке кітапханаларынан кітаптар әкеліп сыйға тартып жатады, - дейді өз сөзінде басшы.

Ал, қашанда туған жердің туын биіктетіп, ел абыройын асқақтатып жүрген текті ағалар  Тайыр Мансұров және Ерлан Бәтташұлы өткен жылдың наурыз айында өз кітаптарын  тарту еткендігінен абайлық қауым құлағдар. Бүгінде осы игі үрдісті жалғастырған жерлесіміз Қуатжан Серікқазыұлы 250 дана кітапты сыйға тартты.

Бұл туындылардың арасында саяси – қоғамдық жинақтар, поэзия, көркем әдебиет және «Қазақ батырлары» сынды фольклорлық-эпостық шығармалар, «Қазақ хандығы» туралы тарихи құнды кітаптар мен әр сала бойынша әдебиеттер бар екен. Мәселен, Берекет Кәрібаевтың «Қазақ хандығының күшеюі», Ораз Қауғабайдың авторлығындағы «Әз Тәуке және Әлмерек», Болатбек Төлепбергеннің «Қасиетім - Желтоқсан» сынды және де «Қазақ хандары», «Қазақ тарихындағы әйелдер», «Қазақ халқының ұлт-азаттық күресі» атты тарихи тұрғыдан тағылымы мол дүниелер топтасқан жинақтар кітапқұмарларды бірден баурап алады. Бұл бірінші кезекте тарихын танып өсу тұрғысынан әсіресе жас ұрпақ үшін таптырмас кітаптар екендігі айқын.

Кітапхананың арнайы мүйісінен орын тепкен бұл кітаптарға қызығушылық танытушылар қазірдің өзінде мол екен. Осынау жаңа қордан сұраныс жасатып жатқан оқырмандардың  алғашқы легіне біз де куә болдық.

Мәселен, рухани орталыққа жиі келетін тұрғындардың бірі Қағазбеков Әлібек ағамыз Қуатжандай халықшыл ұлға абайлық қауым атынан, барша оқырман атынан зор алғысын жеткізе келе, жүрекжарды пікірімен бөлісті.

-Мен осы кітапхананың тұрақты оқырманымын. Түрлі тақырыптағы кітаптарды алып оқимын. Жалпы, Абай елінде өмірін кітапсыз елестете алмайтын жандар көп, солардың  бірімін десем де болады. Ал біз оқырман ретінде бірінші кезекте кітапхана қорына келіп түскен тың туындыларды, жаңашыл бағыттағы соны шығармаларды оқып, сусындағымыз келеді. Осы ретте осынау мәдени орталықты жаңа туындылармен толықтырып жүретін ел ағаларына алғысымыз шексіз. Бүгін міне, кітап қорын байытқан саяси, тарихи, әдеби бағыттағы кітаптарды шолып шығып көңілім толып отыр. Ендігі аралықта уақыт арнап, көңіліме жақын шығармаларды оқып шықпақпын, - дейді кітапқұмар жан.

         Кітап адамзаттың баға жетпес құндылығы болғандықтан сыйға тартылған осы туындылар сөрелерде шаң басып тұрмай, оқырман жүрегінен орын алып, қолданысына жараса дейміз. Міне, бұл асыл қазынамызға деген құрмет болар еді. Өз кезегімізде абайлық қауым атынан, кітапсүйер оқырмандар атынан ел ағасы Қуатжан Уәлиев мырзаға шексіз алғыс білдіреміз. 

 

Тоғжан РАХЫМБЕКҚЫЗЫ,

«Абай елі»

 

2017 жылдың 15 наурызында ШҚО Абай ауданының Қарауыл а. № 49 өрт сөндіру оқу класында «НҰР ОТАН» партиясы Абай ауданының филиалының кеңесшісі А. Ақылбеков, Абай ауданының Құнанбай Қажы мешітінің бас имамы Б. Самырбаев, ШҚО ТЖД Абай ауданының төтенше жағдайлар бөлімі мен № 49-ӨСБ қызметкерлерінің қатысуымен дөңгелек үстел өткізді.

Дөңгелек үстел барысында партия өкілі А.Ақылбеков жеке құрамға Қазақстан Республикасы Президентінің 2017 жылғы 31 қаңтардағы «Қазақстанның үшінші жаңғыртуы: жаһандық бәсекеге қабілеттілік» халыққа жолдауының негізгі ережелері мен мемлекетіміздің осы күнге дейінгі жетістіктері туралы жеткізді. Сонымен қатар, Елбасының Қазақстан халықына арнаған сөздерінде жемқорлық іңдетінің тамырына түбегейлі балта шаппайынша, мемлекетте тұрақты өсіп-өркендеу болмайтынын айтты. Бұл мәселені шешуде мемлекет пен қоғамның күш біріктіруіне көңіл бөліп, атқарылып жатқан сыбайлас жемқорлыққа қарсы жұмысты жақсарту үшін әрбір Қазақстан азаматымен құқықтық-түсіндірме жұмыстарын жақсартып, ол бойында күш тауып, мықты мемлекеттік-құқықтық институттарының пайда болуына үлесін қосу керектігі туралы айта кетті.

Абай ауданының Құнанбай Қажы мешітінің бас имамы Б. Самырбаев адамдардың дұрыс діни көңіл-күйіне кері әсер ететін бірнеше факторларды атап өтіп, діни экстремизм мен терроризмді насихаттаудың алдын алу және оған жол бермеу бойынша, мемлекетіміздегі осы бағыт бойынша атқарылып жатқан жұмыстар туралы жеке құрамға ақпарат жеткізді.

 ШҚО ТЖД Абай ауданының төтенше жағдайлар бөлімі

 

 

Бейсенбі, 09 Наурыз 2017 00:00

ТАЛАПТЫҢ МІНІП ТҰЛПАРЫН...  

Бәрекелді!

 

 

Бүгінгі жас болашақ Қазақстанның жанды бейнесі. Жастарды білім жолына салып, түзу жолдан тайдырмай, санаға сәуле шашар оқу білімнің тізгінін ұстату мемлекет пен қоғамның міндеті саналады. Қандай мықты мемлекет болмасын жастардың білімі мен оқу-ағарту ісіне көп көңіл бөледі. Келешектің іргетасын қалау үшін, ең алдымен сол елдің жастарының саналы ұрпақ болып жетілуіне күш салу керек.

Осы орайда  біздің облысымыздың жас зерттеушілері 2017 жылдың 3-8 ақпаны аралығында Тэджон қаласында (Оңтүстік Корея) WOOSONG Халықаралық университетінің және SolBridge International School of  Business базасында өткізілген «Жас ғалым» халықаралық ғылыми байқауына қатысты. Байқаудың басты мақсаты – ізденіс-зерттеу ісіне қызығушылық танытатын талантты оқушыларды анықтау және қолдау, оқушылардың үздік жетістіктерін насихаттау, Кореяның үздік жоғарғы оқу орындарымен шығармашылық қатынасты дамыту.  

Республикамыздың,облысымыздың,ауданымыздың,мектебіміздің намысын   Абай атындағы жалпы орта білім беретін мектеп-лицейінің  10-сынып оқушысы Ролланұлы Расул  «Алгебрадан стандартты емес есептерді шығару жолдары» тақырыбында  /Жетекшісі  Тлебалдина Назигүл/ қорғап жүлделі ІІІ орынды иеленді.

Байқау қатысушыларына мәдени-танымдық бағдарлама ұйымдастырылды: ETRI электроника және телекоммуникация ғылыми-зерттеу институтына, Сеулдың көрікті жерлеріне, ғылыми тарихи мұражайларға, Император сарайына саяхаттар жасады.

2017 жылдың 12-17 ақпанында Алматы қаласындағы "Алатау" сауықтыру базасында жалпы білім беретін пәндерден республикалық ғылыми жобалар сайысы өтті.

Шараның мақсаты шығармашылық қабілеттерді айқындау және жетілдіру, ғылыми қызметті қолдауға қажетті жағдай жасау, оқушылар тұлғасын айқындайтын әлеуметтік маңыздылығы бар қасиеттерді қалыптастыру.

Шығыс Қазақстан облысынан 8-11 сыныптарда оқитын 51 оқушы (42 жоба) қатысты.

Жарыстың қорытындысы бойынша ШҚО командасы жалпыкомандалық бірінші орын және «Үздік команда» номинациясында дипломмен марапатталды.

Шығыс Қазақстан облысының 30 оқушысы жүлделі орынға ие болды. Бұл жарыста да Расул мектеп мерейін асырып ІІІ орынға ие болды.

 

  Адибаева Айгерім

Абай атындағы ЖОББ мектеп-лицейінің

қазақ тілі мен әдебиеті пәнінің мұғалімі

 

 

 

Бұл туралы ҚР Ішкі істер Министрлігі Көші-қон полиция Департаментінің бастығы Серік Саинов  Орталық коммуникациялар қызметінде өткен баспасөз-мәслихатында хабарлады.

 

«Тұрғылықты мекенжай бойынша арнайы тексерістер жүргізілмейді. Аталмшыш тексеріс Алматыда  Универсиаданы өткізуге дайындыққа қатысты жедел-алдын алу іс-шаралар аясында ғана жүргізілді. Бұл шара тіркеуге байланысты емес.

Біз үшін Универсиаданы жүргізу- халықаралық маңызы бар іс-шара және жалпы әлемдік тәжірибе болып табылады.

«Басқа аймақтарда бірде-бір тексеріс жүргізілмеген. Және де үстіміздегі жылдың наурыз айының ортасына дейін құқық қорғау органдарының қызметкерлері қоғамдық орындарда адамдарды тоқтатып, тексеріп, тіркеу қағазын талап етпейді,-деді С.Саинов.

 

Орталық коммуникациялар қызметі. Астана қаласы

 

 

 

Орталық коммуникациялар қызметінде БАҚ өкілдерінің арасында «Самғау» ұлттық байқауының қорытындысы жарияланды.

«Халық маркасы» қазақстандық тауарлар мен қызметтердің сапасын бақылау жүйесі федерациясының ұйымдастыруымен өткен байқауда қазақстандық брендтер тақырыбына арналды.

Онда еліміздің жер-жерінде экономика тақырыбына қалам тартып жүрген әріптесіміз жеңімпаз атанды.

 Жиында конкурстың құрылтайшысы және ұйымдастырушысы «Халық маркасы» қазақстандық тауарлар мен қызметтердің сапасын бақылау жүйесі федерациясы» ЗТБ президенті Римма Тәжібаева байқаудың отандық өндірушілердің беделін арттыру арқылы төл нарығымызды қалыптастыру және халық арасында отандық өнімді насихаттау үшін БАҚ өкілдерінің күшін біріктіруге арналғанын атап өтті.

–Біз қашаннан бері отандық өнімдердің шетелдікінен артық болмаса, кем еместігін айтып келеміз. Бұрынғы кезеңдермен салыстырғанда, елімізде жасалған өнімдердің сапасы мен пайдалы қасиеттері, дизайны жағынан айтарлықтай ілгерілеушілік бар. Алайда, өз тауарларымыздың артықшылықтарын насихаттау жағы кемшін қалып келеді. Мұны жасыра алмаймыз. Сондықтан байқауды ұйымдастырғанда да, осы олқылықтың орынын толтырып, журналистер қауымын жұмылдыруды көздедік. Біз сол міндеттің үдесінен шықтық деп ойлаймын. Яғни, журналистер арасынан қызығушылық толқынын тудыра алдық, - деді ол.

Оның айтуынша, байқауға 200-ге жуық журналист қатысты.  Олардың денін 18 бен 29 жас аралығындағы жастар болды.

Сонымен бірге ол биылғы наурыз айында байқау жеңімпаздарының Мәскеу қаласына барып, еліміздің өнімдерін насихаттауға арналған көрменің жұмыстарымен танысатынын атап өтті.

Жиында осы іс-шара туралы Еуразиялық Іскери Одақтың атқарушы директоры Сергей Шубин айтып берді. Ол Мәскеу қаласында Еуразиялық Іскери Одақ-ЭКСПО көрмесінің ашылғанын, сол жерде Қазақстанның 20-дан астам бренді ұсынылып отырғанын, наурызға дейін олардың саны 100-ге дейін жететінін айтты. 

«Халық маркасы» Қазақстандық тауарлар мен қызметтердің сапасын бақылау жүйесі федерациясы» ЗТБ президенті Римма Тәжібаева осы мақсатnа өзі жетекшілік ететін ұйым мен Еуразиялық Іскери Одақ арасында өзара ынтымақтастық жөніндегі келісімшарт жасау бойынша даййындық жұмыстарының жасалып жатқанын мәлімдеді.  

– Біз отандық өнімдерді барынша насихаттап жатырмыз. Елімізде бүкіл жер-жүзіне қазақстандық бренд болатын, соны ұялмай көрсететін өнімдеріміз жеткілікті. Сол үшін 8 наурызда «Астана ЭКСПО-2017» көрмесі қарсаңында Астана қаласында «Ұлы дала» қазақстандық тауарлар павильонын ашуды жоспарлап отырмыз. Онда халық маркасы сертификатына ие болған 100 үздік отандық брендтің өнімдері шетелдік туристер назарына ұсынылады, – деді Р.Тәжібаева.

         Жиын соңында конкурсты ұйымдастырушылар «Самғау» ұлттық байқауының жеңімпаздары марапаттап, оларға дүниежүзі елдерін аралауға мүмкіндік беретін сертификаттар табыс етті. Енді бас жүлдегерлердің қатарында болған  «Егемен Қазақстан» республикалық газетінің тілшісі Арнұр Асқаров Грузияға баратын болса, Bag.kz порталының журналисі Дәулет Жиенқұлов Біріккен Араб Әмірліктеріне жолдама алды. Сол сияқты «Самғау» ұлттық байқауының Алматы қаласы бойынша номинациясының иегерлері – блогер Вера Ляховская Қытайға, Nur.kz порталының шығарушы редакторы Ақырыс Сейтқазы Үндістанға барады. Байқаудың Акмола облысы бойынша номинациясының иегері – «Қазақстан» РТРК Ақмола облыстық филиалы, Қазақстан-Көкшетау телеарнасының жүргізуші-редакторы Раушан Сайлауқызы Ресей Федерациясына, «Bnews.kz» ақпарат агенттігінің Алматы облысындағы меншікті тілшісі Хасан Еспанов Әзербайжанға, Қарағанды облыстық «Орталық Қазақстан» газетінің редакциясы жауапты хатшысының орынбасары Нұрқанат Қанафин Украинаға жолдама алса, «Маңғыстау» газетінің тілшісі Валентина Қозыбақова Түркияға жолға шығады. Сонымен бірге «Самғау» ұлттық байқауының Жамбыл облысы бойынша номинациясының иегері – «Shyraiber.kz» ақпарат агенттігінің бас редакторы Айшат Жуасбаева Беларуське, Оңтүстік Қазақстан облыстық қоғамдық-саяси «Оңтүстік Қазақстан» газетінің тілшісі Жәмила Мамырәлі Арменияға, «Неделя СК» облыстық апталық жарнамалық-ақпараттық газетінің шолушысы,  «Информбюро» ақпарат агенттігінің Солтүстік Қазақстан облысы бойынша тілшісі Алена Любушак Тайландқа барып келеді. Ал Қазақ радиосының Шығыс Қазақстан облысындағы меншікті тілшісі Дәулет Абылқасымовқа Египет Араб Республикасына жолдама берілді.

 

Page 6 of 29

Біз туралы

Бас редактор: Байтусов Нуржан Мейзханович   

Тілшілер:  Сарсенбина Анар Қабдуалиқызы

Тілшілер: Рақымбекқызы Тоғжан 

Компьютерде теруші: Дукенбаева Баян 

 

 

Сайт материалдарымызды пайдаланғанда дереккөзге сілтеме көрсету міндетті.

Авторлар пікірі мен редакция көзқарасы сәйкес келе бермеуі мүмкін.

Жарнама мен хабарландырулардың мазмұнына жарнама беруші жауапты.

Соңғы жаңалықтар