Абай елі

Абай елі

Дүйсенбі, 20 Қараша 2017 00:00

ЛАТЫН ТІЛІ – УАҚЫТ ТАЛАБЫ  

  Үстіміздегі жылдың 20 қазанында Абайдың «Жидебай-Бөрілі» мемлекеттік қорық-музейіндегі «Латын тілі – уақыт талабы» дөңгелек үстел басында латын графикасына негізделген қазақ әліпбиіне байланысты үлкен жиын болып өтті. Мұнда осы мәдени мекеменің жетекші ғылыми қызметкері М.Кенемолдин «Латын тілі – уақыт талабы» деген тақырыпта баяндама жасады. «Елбасы «Болашаққа бағдар:  рухани жаңғыру» атты мақаласында  айтқандай, - деді ол, - қазіргі уақытта қазақ тілін латын әліпбиіне көшіру мәселесі жан-жақты талқыланып, 2025 жылға дейін толықтай жүзеге асыру қолға алынды».

Шынында латын графикасына көшу – уақыт талабы, мемлекеттік маңызды мәселе болып табылады. Бүгінде латын тілі – цифрлы технология, ақпарат, коммуникация тіліне айналып отыр. Бұл латын тілінің саяси-экономикалық, мәдени-әлеуметтік және тағы басқадай әлеуеттік басымдықтарын көрсетеді. Сол себепті латын әліпбиіне негізделген жазу түрі жер жүзінде кең қолданысқа ие. Мысалы, әлем халықтарының 40 пайызы осы латын графикасына негізделген әліпби жүйесін пайдаланады. Мұның өзі латын тілі – әлемдік өркениет тілі екенін айғақтайды.

Сондықтан да әлемдік бәсекеге қабілетті болу үшін бізге латын графикасына негізделген қазақ әліпбиін тезірек қолданысқа енгізуіміз қажет. Міне, мемлекеттік тілге байланысты өткізілген «Латын тілі – уақыт талабы» дөңгелек үстел басындағы әңгіме осындай мәселелер төңірегінде өрбіп, қызу талқыға түсті.

Шараға Абай музейінің ұжымы, Семей қаласындағы Шәкәрім атындағы мемлекеттік университеттің филология факультетінің студенттері мен оқытушылары, зиялы қауым өкілдері қатысты.

 

Абайдың «Жидебай-Бөрілі» мемлекеттік

қорық-музейінің баспасөз қызметі.     

Дүйсенбі, 20 Қараша 2017 00:00

«АҚ ОРАМАЛ» -ІЗГІЛІКТІҢ БАСТАУЫ

Рухани жаңғыру: ұлттық код

Ұлттық болмысымызды айғақтайтын ұлы ұғымдардың бірі – ақ орамал! Жомарттық пен ақжарма пейілдің айқын нышаны саналатын, әр қазақ үшін қастерлі осынау атаудың өзіндік терең мән-мағынасы бар. Бағзыдан жеткен бұл ұғымның байыбын әсіресе ақ жаулықты әжелер қауымы жақсы түсінеді.

Ұлттық үрдістің тіні үзілмеген ұлылар елінде қазақы дәстүр мен салт-жоралғылар аясында түрлі шаралар жиі дүбірлеп өтіп жатады. Әсіресе, рухы өр, өресі биік, қаймағы бұзылмаған қазақы мінезі бар  осынау өлкеде аузы дуалы ақсақалдар мен ел берекесін ұйытқан ақ жаулықты әжелерінің тәрбие мектебінің үлесі зор. Бұл ретте, жас ұрпақ алдында сан алуан асыл қасиеттерді, ұлттық құндылықтарды насихаттап, салт- дәстүрімізді дәріптеуде ерен еңбек сіңіріп жүрген ауданымыздағы  «Нұр-Сана» салт-дәстүр орталығының әжелері осы үдеден табылуда.

Кешегі Айпара, Зере сынды рулы елдің арқа тұтары болған әжелеріміздің бүгінгі сарқыты арамызда жүр десек артық айтпағандығымыз. «Нұр-сана» салт-дәстүр орталығының кимешекті апалары туралы да осындай ізгі ой түюге болады. Аталмыш ұжым құрылған уақыттан бері аудан көлемінде ұланғайыр шараларға ұйытқы болды. Оған дәлел ретінде, биылғы жылы әжелеріміздің бастамасымен өткізілген «Қауышу», «Алғыс айту», «Ақ дастархан», «Ақ орамал» сынды игі дәстүрлеріміздің көптің көңілінен шығып, сыйластыққа, бауырмалдыққа, жалпы ізгі ниетке жол ашқанын айтсақ та болады. «Ананың тілегі ақ» деген осы-да.

Жуырда орталық жетекшісі Қаныша Нұрғалиева бастаған әжелеріміз жоспарлы күнге  орайластырып  тағы бір шараны жоғары деңгейде ұйымдастырып өткізді. Бұдан бұрын да сан мәрте «Ақ дастархан» шарасын жоғары деңгейде атқарған әжелер «Ақ орамал» атты шарамен  жалғастырып,  тәрбиелік, тәлімдік аясын кеңейте түскендей.

«Ақ орамал» іс-шарасы арқылы әулеттің қамқоршылары ақ жаулықты аналардың жас аналарға  деген аналық ақ тілегінің, ерекше ілтипатының куәсі болдық. Яғни, үлкен тағылымның бастауы -  ана мектебінен алар тәрбиенің алтын арқауын көрсетіп берді.

Бұл күні әжелер ақ дастархан жайды. Келелі басқосуда өрелі әңгімелер өрбіді. Әжелердің дәміне жас аналарға үлгі ретінде  бүгінде ұрпақ та өсіріп, аудан мәдениетінің өркендеуіне де үлес қосып, отбасында ғана емес еңбекте де бақытты ана атанған, еңбектері еселі, өзінің ақыл-парасатымен, білімділігімен бір мекеменің тұтқасын ұстап, ұйымдастыру мен басқару жолында өзгелерге үлгі боларлық іс атқарып жүрген Бозанбаева Бақыт Мұсабекқызы мен  Орынғожина Лаура Советқызы сынды басшы аналар, сондай-ақ  жанұя шаттығы мен жан жылуын үйлестіріп, ер –азаматты сыйлауда, ұрпақ тәрбиелеуде айшықты ісі бар Жәмилә Жанғалиева, Қарлыға Оразалина сынды аяулы аналарымыз арнайы шақырылыпты. Ауданымыздың  ел құрметтеген ақыны  Төлеген Жанғалиевтің жары Жәмилә анамыз жас аналарға ізгі лебізін арнап, ақ орамал жауып, тәбәрік тарту етті.  Тағылымды да тәрбиелік мәні зор басқосуды «Нұр-Сана» салт-дәстүр орталығының төрайымы Қаныша Нұрғалиқызы ұлағатты сөздерімен ашып, жас ұрпақты тәрбиелеуде атқарып жатқан айшықты еңбектеріне  тоқталып өтіп, жас аналарға ақыл-кеңестерін айта келе, бақытты жанұя болуларына  аналық ақ жүрегімен  тілектестігін білдірді. Қызметте табысты да іскер басшылар әзіз әжелердің тәрбие ошағы болған осынау салт –дәстүр орталығының ұмытылып бара жатқан дәстүрімізді жаңғырту мақсатында үлкен іс атқарып отырғандығын айта келе, бұл іс мәңгілік, ұрпақтан ұрпаққа мәңгі қалатындығын  жеткізді.  Жас аналарымыз үбірлі-шүбірлі болып, елге үлгі боларлықтай жанұя болсын деген тілектер ағытылды. Иә, ізгі дәстүрді ел есіне оралту қоғамның барлық мүшесі мен әр азаматтың бейбітшілік пен тұрақтылықтың сақталуы жолындағы жауапкершілігін арттыру көзделген.  

«Ақ орамал-ақ тілек» демекші, ауыл аналары жай басқосу жасамапты, дөңгелек үстел аясында жас келіннің міндеті, отбасының   маңызы мен құндылығы жөнінде де тағылымды әңгіме өрбітті. Осы орайда, жас аналарға көңілдері ақ болсын, бастарына бақыт құсы қонсын, тазалық пен ізгілік жандарына серік болсын деген ниетпен Қаныша апамыз да ақ орамал сыйлап, аналардың жолын берсін деген ақжарма тілегін төгілтіп, халық әндері  шырқалып, жиналғандарды әдемі әсерге бөледі.

Келелі әңгіме кестелі көрініс тапты. Атап айтсақ, жас аналарға  орамалдың қасиеті жайлы,  жас ананың сәбилі болғандағы жағдайы, сәби күтімі сынды тәрбиелік мәні бар әңгімелер айтылып, инабатты келін, ақ жаулықты ана болуға тілектестігін білдірді.  Өз кезегінде жас аналар да өздерінің жылы ілтипаттарын, ризашылықтарын білдіріп,  қазақтың салтына сай орамалды басынан тастамайтын үлгілі келін болуға уәде берді.   

  1. S Міне, әжелер өткізген бір ғана кештің мән-маңыздылығы осылайша тереңнен орын алды. Осынау сәтте жас отауға неке куәлігін салтанатты түрде тапсыратын аудандық жұмыспен қамту және әлеуметтік бағдарламалар бөлімінің бас маманы Әйгерім Боранбайқызы мен бөлім маманы Айнұр Бакирова  да отбасы құндылығы, сыйластық, ауызбіршілік сынды құнды қасиеттер жайлы әсерлі әңгімелеп, жас аналарға  жанұя бақытын тілеп, жас ұрпаққа үлгі боларлықтай осындай игілікті шараларды тұрақты өткізіп келе жатқан әзиз әжелерге  зор алғысын жеткізді.   

Бүгінгі жас отау иелерін, жас аналарды  қазақы мәнер, ұлттық үрдіс негізінде сусындатудың маңызы зор. Бейбітшілік пен бірлікті, татулықты, қазақтың салт-дәстүрін дәріптейтін «Ақ орамал» шарасы алдағы уақытта да жалғасын таба бермек.  Ақ дастархан басында сән-салтанат орнап, сыйластықпен сый-сыбаға тартылған, отбасы мен еңбекте де елге үлгі болған іскер басшы аналар мен көрген-түйгені мен  тағылымы мол ардақты аналардың ақыл-кеңесі мен жүректен жыр ағытылған бұл күн жас аналар  есінен мәңгілік кетпесі анық.

 Анар СӘРСЕНБИНА,

«Абай елі»

 

 

Дүйсенбі, 20 Қараша 2017 00:00

АУЫЛ АХУАЛЫ БАСТЫ НАЗАРДА  

Аудан әкімінің жұмыс сапары

 Абай еліне жаңадан тағайындалған аудан әкімі Жарқынбек Байсабыровтың ауылдық округтерді аралау, елді мекендер тыныс-тіршілігі, әлеуметтік ахуалымен  танысу мақсатындағы сапары осы жолы бірқатар ауылдармен толықты. Жергілікті жерлердегі маңызды нысандарда болып, қызмет ырғағына қаныққан Ж.Борашұлы тың тапсырмалар мен жаңа міндеттер қатарын нақтылады. Сәйкесінше, ауылдардағы анықталған мәселелер атқарушы билік өкілдерінің тікелей қатысуымен шешімін табатын болады. Тіпті, жаңа тапсырмалардың орындалу мерзімі де белгіленіп, жауапты тұлғалар да бекітілді.

Шалғайдағы Саржал ауылына ат басын тіреген аудан басшысы ең алдымен ауылдың кіреберісіне назар аударды. Мезгіл қара күздегі жиын-терім науқанының соңғы кезеңі болғандықтан ба, ауыл іші мен көшелер бойының тазалығы біршама сын көтермейді екен. Сол тәрізді мектеп ауласына да қыс алдында бір мәрте тазалық жүргізу қажеттілігі  байқалып тұрды. Бұл орайда ауылдық әкімдік қызметкерлеріне тазалық жұмыстарын жүргізіп, фотоесеп түрінде аудандық әкімдікке ұсыну жүктелді.

Аудан әкімі Жарқынбек Борашұлы ауылдағы Тоқжігітов мектебінде ұзағырақ аялдады. Әсіресе, алдағы қатал қысқа даярлық жұмыстарын пысықтау мақсатында білім ордасының жылу қазандығында болды. Мұндағы анықталған бір жайт, мектеп қазандығының қысқы көмірі Семей қаласынан тасымалданады екен. Демек, жолдың алыстығы өз алдына, қатты отын нарқына көмір кенішінен қалаға жеткізуші ҚТЖ жүк тасымалының да үстеме бағасы қосылады деген сөз. Аудан әкімі бұл орайда көмірді тікелей өндірушілерден, яғни, Қаражыраның өз басынан тасымалдауды тапсырып, «Әлем жолдары» мердігерлік компаниясына ұсыныспен шығу керектігін айтты.  

Білім ордасын аралау барысында нақтыланған бір жайт, Тоқжігітов мектебінен робототехника, физика, биология кабинеттерін жабдықтау үшін ауылдан түлеп ұшқан азаматтарды демеушілік көрсету мақсатында тарту жайлы да сөз болды.

Қымызды ауыл Саржалда ұлттық сусын тақырыбы да аудан әкімі назарын аудармай қоймады. Бұл ретте Жарқынбек Борашұлы жергілікті қымыз индустиясын дамыту мақсатында арнайы ауылшаруашылық кооперативтерін құру туралы тапсырма берді. Осы арқылы мемлекеттік жеңілдіктерге оңай қол жеткізуге болады.

Бұл ретте қыстамаға кіретін жылқы түлігі жайлы да сөз қозғалды. Өткен жылдың есепті мерзімінде қар мен аяздың зардабынан шаруалардың қиын жағдайда қалғаны әлі де есте. Осынау жағдайдың қайталанбауы үшін әсіресе қамбар ата түлігін өсіретіндермен жем-шөп қорын әзірлеу туралы түсінік жүргізілуі тиіс. Мәселен, Үржар, Аягөз аудандарынан Қаражыраға ағылатын ауыр жүк көліктері бос келеді. Олармен тиімді келісім жасасып, облыс күнгейінен арзан бағадағы шөп пен құрамажем жеткізу мәселесін ойластыру керек. Аудан әкімі көтерген аталмыш тараптағы мәселе саржалдықтарға біршама ой салды. Бұл мәселелермен белгіленген мерзімге дейін аудан әкімінің орынбасары Бауыржан Тәттібековпен Думан Нариманұлы айналысатын болады.

Аудан басшысы Тоқтамыс ауылындағы Молдағалиев мектебінде де ұзағырақ аялдады. Биылғы күзде мектеп төбесінен жауын суы ағыпты. Уақыт оздырмай шатырға күрделі жөндеу жүргізу қажет. Ол үшін арнайы ұсыныс әзірлеу қажет.

Жарқынбек Борашұлы сонымен қатар, мектеп асханасындағы балалардың ас мәзіріне де назар аударып, аймақтағы іргелі компания «Эмиль» ЖШС-не сүт өнімдерін жеткізу үшін өтінім беру керектігін жеткізді.

Ал, Медеу ауылында орта мектепке келген аудан басшысы білім ордасының жылу қазандығына бірінші кезекте көңіл аударды. Мұндағы қазандыққа екінші электр сорғысын орнату қажет. Сонымен қатар, түсірілетін көмірді өлшеп алу мен сапасын қадағалау да нақты берілген тапсырмалар қатарын қамтыды.

Жалпы, мектеп қазандығының жұмысы сын көтерімді. Тіпті, берілетін жылуды тиімді тұтынып, ауылдағы мәдениет үйін де жылытуға толық мүмкіндік бар. Бұл мәселе ұсыныс ретінде көтерілер болса, аудандық әкімдік тарапынан жанды көмек көрсетілетін болады.

Анықталған бір жайт, ауылдық округтердегі мәдениет мекемелерін қысқы мерзімдегі жылыту мәселесі тұрғындар тарапынан жиі көтерілгенімен аталмыш бағытта тұшымды, толыққанды жұмыс жүргізілмейді. Сол себепті де, барлық ауылдарда орын тепкен мәдениет үйлері мен ауылдық клубтарына қысқы мерзімдегі жылыту маусымында қанша қаражат жұмсалатынын анықтау қажет. Бұл туралы аудан әкімінің орынбасары Бауыржан Тәттібековпен Елдар Оразалыға арнайы ақпарат әзірлеу туралы міндеттеме жүктелді.

Медеу ауылында да назар аударарлық бірқатар мәселелер бар екен. Атап айтсақ, ауылдағы малдәрігерлік пунктінің электр қуатына берешегін төлеп, құжаттарын реттестіріп, теңгерімге алу тапсырылды.

Аудан басшысы ауылдық округтерге жасаған жұмыс сапары барысында Архат ауылында да ұзағырақ аялдады. Әсіресе, ауыл мектебіндегі атқарылған шараларға қанығып, алдағы атқарылар міндеттемелерді межеледі. Атап айтсақ, Бекбосынов орта мектебіне жылыжай жасатып, қысқы мерзімде де гүл өсіру қажет. Бұл бірінші кезекте оқушылардың табиғатпен етене болуын қамтамасыз етеді.   

Сондай-ақ, мектеп қазандығына көмірдің толық түсірілуін, рәсуә болмауын қадағалау да маңызды мәселелер қатарын қамтиды.

Бүгінде аталмыш білім ордасында шағын орталық жұмыс істеп тұр. Бұл тарапта туындайтын бір жайт - шағын орталықты бірыңғай бір жақта орналастыру қажет. Осынау мәселе аталмыш ауылдық округке қарасты Орда ауылындағы Мамай атындағы негізгі білім беретін мектепті аралау барысында да жауапты адамдарға тапсырылды.

Жалпы, аудан әкімі атап өткендей, аудан мектептеріндегі шағын орталықтар жұмысын әлі де жүйелеу қажет. Орталықтар қызметінің санитариялық талаптарға сәйкестігін анықтап, қажет жағдайда материалдық көмек көрсетілуі тиіс. Осы тәрізді қысқа даярлық жұмыстарын отынның түсірілуімен қоса қадағалау керек. «Бармақ басты, көз қыстылыққа» жол берілмеуі тиіс. Бұл бағытта жанды шаралар жүргізу үшін аудандық деңгейдегі комиссия құрылатын болады. Яғни, қараша айының 20 жұлдызынан бастап тексеру жұмыстары жүргізілуі керек.

Ал, Мамай атындағы мектеп жұмысымен танысқан аудан басшысы оқыту мен тәрбие процесіне кедергі тумауы керектігін жеткізді. Мәселен, аталмыш білім ордасындағы оқушыларды саз мектебіне жеткізу үшін арнайы көлік шығару туралы ой айтылды. Я болмаса Архат ауылынан саз мектебінің филиалын ашу мәселесін қарастыру керек.  Бұл тараптағы тапсырмалар аудандық білім бөлімі басшысына міндеттелді.

Шағын ауылдағы әлеуметтік мәселелерді біртіндеп шешу міндет. Алдыңғы кезекте Орда ауылынан су қорын анықтап, орталықтандырылған су желісін құру туралы ұсыныс әзірлеу ісі тұр. Бұл жайында ауылдық округ әкімі Ардақ Өміртаев аудандық әкімдікке тиісті ұсыныспен шығуы қажет.

Қорыта айтқанда, барлық ауылдық округтердегі анықталған ірілі-ұсақты мәселелер заң аясында, техникалық-материалдық талап үдесінде, артық шығынсыз һәм уақытты созбастан атқарылуы тиіс. Нақтыланған сауалдар алдағы уақытта да аудан әкімі Жарқынбек Борашұлының басты назарында болады.

 

Нұржан БАЙТӨС,

«Абай елі»

 

Облыстық спартакиада

 

 Елбасының «Қазақстан – 2050» стратегиясында атап өтілгендей, спорттың бұқаралығын арттыру күн талабынан түспей келеді. Аталмыш бағыт бойынша атқарылып жатқан ілкімді шаралар қатары аз емес. Жуырда аймағымыз бойынша қалалар мен аудандар, облыстық басқармалар мен аумақтық  департаменттер арасында ұйымдастырылған мемлекеттік қызметшілердің XVI облыстық спартакиадасы болып өтті.

Кілең мемлекеттік қызметкерлер ғана қатысқан бұл жолғы спартакиада спорттың 7 түрінен өткізілді. Атап айтсақ, волейбол, футзал, үстел теннисі, шахмат, суға жүзу, бильярд және шаңғы жарысы бойынша сайыстар ұйымдастырылды.

Қызу өрбіген жарысқа 14 ауданнан өкілдер қатысып, өзара 4 топқа бөлініп бақ сынасты. Атап айтсақ, І-ші топта  Тарбағатай,  Шемонайха,  Бородулиха аудандары өнер көрсетсе, ІІ-ші топта   Күршім, Үржар, Жарма аудандары сынға түсті. Ал, келесі ІІІ-ші топта Катон-Қарағай, Бесқарағай, Зайсан, Аягөз аудандары, келесі кезектегі ІV-ші топта  Көкпекті, Глубокое, Ұлан, Абай аудандары өзара қарымта байқасты. Біздің жерлестеріміз түскен топ осыған дейінгі спартакиадаларда топ жарып жүрген кіл мықтылар болатын.

Сайыс - қызу өрбіді. Топтық бәсекеде жеңістерге жету оңайға түскен жоқ. Әйтседе, Абай ауданының намысын қорғаған спартакиада қатысушылары өз тобында бірінші орынмен топ жарып, жартылай финалда Бородулиха ауданымен кездесіп, финалға жолдама алды. Ал, финалдық ойында ең азулы команда Күршім ауданымен кездесіп, тартысты түрде сынға түсті. Нәтижесінде жүлделі 2-ші орынға ие болды.

Абай елінің құрама командасы сапында аудан әкімінің орынбасары Бауыржан Тәттібеков бастаған аудандық әкімдіктің бөлім басшылары мен мамандары - Еркебұлан Сағындықов, Ұлан Сағадиев, Нұрбек Тлеумбердин, Тілек Сағынбаев, Жандос Сайлаубеков, Данияр Алмасов, Дархан Сүлейменов, Алмат Балтабек сынды азаматтар сынға түскен болатын.

 «Абай елі» ақпараты

 

 

 

 

 

 

Дүйсенбі, 20 Қараша 2017 00:00

ДӘРІС АРҚАУЫ - ЛАТЫН ӘЛІПБИІ  

Құндызды

Қараша айының 7-і күні Құндызды ауылындағы Ш.Әбенов атындағы орта мектепте ауылдық округ әкімі аппаратының бас маманы Б.Сыдықова,  мектеп директорының тәрбие ісі  жөніндегі орынбасары С.Байшеров, қазақ тілі пәнінің оқытушысы, жастар мәслихатының депутаты А.Тәжмұхаметовалардың ұйытқы болуымен  мән-мағынасы зор ерекше жиын өтті. Басқосуға негізінен ұстаздар мен оқушылар қатысқан болатын.

Танымдық, тағылымдық дәріс барысында Елбасы Н.Назарбаевтың «Болашаққа бағдар: рухани жаңғыру» мақаласының негізгі басымдықтары түсіндіріліп, оның ішінде «Латын әліпбиіне көшу – қазақ тілін халықаралық дәрежеге шығарады» атты тарау кең көлемде талқыланды.

Сонымен қатар, көпшілікке ел Президентінің ағымдағы жылғы 26 қазандағы №569 жарлығымен бекітілген латын графикасына негізделген қазақ тілінің жаңа әліпбиі таныстырылды. Оған дереккөз ретінде облыстық «Дидар» газетінің жуырдағы, 28 қазан күнгі №126 саны алыныпты.

Жалпы, жиын барысында ұстаздар тарапынан тарих пәнінің оқытушысы М.Еңсеханов өз ойын білдіре келе, латын қарпіне көшу заман талабы екендігін айтып өтті. Ел болашағы үшін, дамыған елдердің қатарына қосылу үшін, ағылшын тілін, ақпараттық технологиялар тілін меңгеру үшін латын қарпіне көшудің қажеттілігін дәйекті түрде жеткізді.

Дәріс барысында оқушылар да белсенділік танытып, туындаған сауалдарын қойып, тұшымды жауап ала алды. ты.

 Бақытжан СЫДЫҚОВА,

Құндызды ауылдық округі әкімі

аппаратының жастар ісі маманы

 

Дүйсенбі, 20 Қараша 2017 00:00

Елдің атын шығарған

Өмірден кеше ғана өткен Абай елінің қадірменді ақсақалы Қалмет Ысқақовтың немересі Қуаныш Ысқақов егемен елімізде қазақ күресінен тұңғыш рет ұйымдастырылған Әлем біріншілігінде өз салмақ дәрежесі бойынша «Әлем чемпионы» атанып, егемен еліміздің Әнұранын аспандатты. Жарысқа дүниежүзінің 80-нен астам мемлекетінің палуандары қатысты. Қуанышты осы жеңісімен құттықтап, абайлық ақын Төлеген Жанғалиевтың арнау өлеңін жариялап отырмыз.

 

Қалмет аға, қабіріңде бір ауна,

Немереңіз шықты міне, шығанға.

Құран ұстап өтіп едің өмірден,

Қуанышты қорғап жатыр бір Алла.

           Ысқақ атың кетті тарап Әлемге,

            Тектілікті міне, осылай дәлелде.

            Елдің атын Ер шығарып жатқанда,

             Ер қадірін танымаған Ел, ел ме?!

Хан Шыңғысым, қане, сен де түрегел,

Хан көтеріп ұрпағыңды сүйенер.

Бес құрлықты белге орап алар ек,

Он бес емес, жүз мың болсақ біз егер!

        

          Он бес-ақ мың халқымыздың бар саны,

           Сол халықпен бас шайқаттық баршаны.

           Еуразия кіндігінде тұрған соң,

           Елім менің көктен қуат тартады.

Қарауылым, қасиетті нар төбем,

Қай кезде де биік сенің мәртебең.

Ерге қуан, ел мерейін өсірген,

«Елім» деген Ер тумаса, қайтер ең...

        Ер шығарған айналайын, Ел сенен,

        Бұра тартып бұзылмайтын дертеден.

        Іші күйсе, тұз жаласын басқалар,

        Ішіп, жемін ақшаменен өлшеген!

Біздің елде Ерлік, Еңбек-тек қолда,

Терсіз келген мақтаныш та, мақтан ба?

Жеңіспенен желбіретіп Көк туды,

Әнұранды әуелетіп жатқанда.

        Құдай берген Қуанышым, батырым,

         Қуаныштан мен де шалқып, тасыдым.

         Алда да әлі арқар тұяқ сақадай,

         Жапыра бер жалпақ жұрттың асығын!

Ағаң, абайлық ақын Төлеген Жанғалиев

 

Дүйсенбі, 20 Қараша 2017 00:00

ЖАҢА МІНДЕТТЕР МЕЖЕЛЕНДІ   

Аудан әкімінің жұмыс сапары

 Жуырда Абай ауданына жаңадан тағайындалған әкім Жарқынбек Байсабыров арнайы жұмыс сапарымен бірқатар ауылдық округтерде болып қайтты. Бірінші кезекте елді мекендердің тыныс-тіршілігімен, кәсіптік өмірімен танысып, орын алған әлеуметтік мәселелер қатарына қанықты. Сонымен қатар, ауылшаруашылық саласы мен абаттандыру шаралары жайын да арнайы қарап, тұрғындар тілегіне де құлақ түрді. Осынау сапар барысында аудан өмірі жайында тың мағлұматтарға қаныққан Жарқынбек Борашұлы алдағы атқарылар шараларды межелеп, жоспарлы жұмыстар қатарын нақтылады.

Алдыңғы кезекте аудан орталығы Қарауыл ауылындағы әлеуметтік нысандарды аралап шыққан Жарқынбек Байсабыров аталмыш бағытта жанды жұмыс жүргізу барысында бірқатар тапсырмалар мен міндеттемелер тұрғанына көз жеткізді. Өз орайында бұл мәселелердің шешімі де қиындық тудырмайды екен. Мемлекеттік қызметте, басқару саласында жинақтаған мол тәжірибесі бар Ж.Борашұлы Қарауыл ауылдық округі әкімдігі ғимаратына жөндеу жұмыстарын жергілікті өзін-өзі басқару шоты арқылы жүргізу жайлы ұсыныс жасауға кеңес берді. Аталмыш бағытта ауылдық округ әкімі Мейіржан Смағұлов жұмыс жүргізетін болады.

Сонымен қатар, аудан орталығындағы мәдени нысандарды да назардан тыс қалдырмаған аудан әкімі М.Әуезов атындағы орталықтандырылған кітапханаға балаларға арналған ертегі кітаптар алу, жаңа шығармалармен толықтыру, мерзімдік баспасөзге жазылу, жаңа компьютерлер алу жұмыстарын ширату керектігін жеткізді. Бұл тарапта кітапхана қызметкерлеріне қиындықтар туындамауы тиіс.

Ал аудандық орталық емхана ғимаратында болып, жұмыс ырғағымен толық танысып шыққан Ж.Борашұлы ем қабылдаушылар үшін әлі де болса қолайлылық жасау қажеттігін тілге тиек ете келе, медицина саласы басшыларына бірқатар тапсырмалар жүктеді.

Сол тәрізді Қарауылда орын тепкен іргелі білім беру мекемесі Абай атындағы жалпы орта білім беретін мектепте болып, педагогтар қауымына құлақ түрген Ж.Байсабыров оқу-тәрбие процесінің нәтижелі жүргізіліп жатқанына қуаныш білдірді. Бүгінде білім ордасының материалдық базасы да ойдағыдай жабдықталған. Сынып бөлмелері заманауи талаптарға толығымен сай. Тек қана ғимаратқа орталықтандырылған ауызсу жүйесі қажет. Бұл тарапта аудандық білім бөлімі мен мектеп-лицей басшылығы аудандық әкімдікке аталмыш мәселе бойынша ұсыныспен шығуы тиіс.

Жалпы, аудан басшысы округтердегі нысандардың жылу және сумен қамту жүйелеріне бірінші кезекте назар аударды. Мәселен, жүзу бассейнінің ғимаратын жылумен қамтамасыз ету мәселесін қарастырып, шешуді күн талабына қойса, орталық жылыту қазандықтарында көмірдің жануы бойынша орташа бір айлық көрсеткіштердің үнемді болуын қадағалауды тапсырды. Мемлекет мүлкін рәсуә етпеу де маңызды мәселе.

Аудан басшысы жергілікті өндіріс ошақтары жұмысымен де танысып, қызмет барысына қанықты. Бұл орайда бірқатар тың міндеттемелер де айқындалды. Атап айтсақ, «Дерикар» ЖШС жұмысын қарқын алдырту мақсатында қытайлық серіктестермен кездесіп, жүн өндеу цехына қосымша шикізат көздерін қарастырып, көршілес аудандармен өндірістік байланыс орнату көзделмек. Мұнымен қоса, аудан өмірінде алар орны аса зор ШЖҚ «Риза» КМҚ мекемесінің материалдық-техникалық базасын толықтыру, яғни, жаңа техникалар алу қажеттігі жайында да сөз қозғалып, келелі мәселе көтерілді. Бұл бағыттағы атқарылатын шаралармен тапсырмалар қатары аудан әкімі Ж.Байсабыровтың жеке қадағалауында болмақ.

Бұдан өзге аудан әкімі келесі жылы барлық ауылдық округтерде мал дәрігерлік пункттерін ашу туралы жауапты тұлғаларға тиісті тапсырмалар берді.

Алдағы уақытта ауданымызда құрылыс және қайта жаңғырту, күрделі жөндеу жүргізу шаралары қарқынын жоғарылатпақ. Бұл бағыт бойынша бірқатар мекемелер межеге алынып, жоспарға енгізілді. Мәселен, аудан орталығындағы балалар және жасөспірімдер спорт мектебінің басшылығына, аудандық білім бөлімі басшысына аталмыш мектептің ескі ғимаратын жөндеу бойынша қажетті құжаттар әзірлеп, ресми түрде ұсыныс енгізу жайлы міндет жүктелді.

Десекте, Қарауыл ауылы бойынша атқарылуы тиіс жұмыстар реті тым көп. Алдағы жылдың үлесіндегі межелі міндеттер құрамында Қарауыл өзеніндегі көпірдің жөндеу жұмыстарының жобалық-сметалық құжаттамасын аудан әкіміне ұсыну, аталмыш нысан маңындағы өзен арнасын аршу шаралары тұр. Бұдан өзге аудан орталығының сәулетіне нұқсан келтіретін ескірген будкаларды алу, көпқабатты тұрғынүйлердегі қордаланған мәселелерді шешуде де кідіріссіз түрде ілкімді жұмыс жүргізу керек. Бұл бағыттағы жұмыстар ендігі аралықта ауылдық округ әкімі Мейіржан Смағұловтың нұсқауымен жүргізілетін болады.

Жалпы, аудан әкімі Жарқынбек Байсабыров Абай ауданының ішкі мүмкіндіктері жоғары екендігін айта келе, экономикалық және әлеуметтік ықпалдастықты арттыру мақсатында іргелі шаралар ұйымдастыру керектігін алға тартты. Мәселен, «Менің мектебім» акциясы аясында Абай ауданының кәсіпкерлерімен «Туған жер» форумын өткізу туралы бастама көтерді. Бұл шара өз кезегінде бірқатар қордаланған мәселелердің шешім тауып, көзделген жоспарлы шаралардың нәтижелі іске асуына септігін тигізбек. Аталмыш бағытта аудан әкімінің орынбасары Б.Тәттібеков, бөлімдер басшылары М.Нұрсұлтанұлы, Д.Нариманұлы тиісті жұмыс жүргізбек. Осы тарапта аудан активі тарапынан ұсыныс-пікірлер де ескеріледі.

   Өз қызметінің алғашқы күндерінде-ақ аудан өмірімен танысуды міндет етіп қойған Абай елінің жаңа басшысы Жарқынбек Борашұлы ауылдық округтер ахуалын да назарға алды. Мәселен, Құндызды ауылындағы жұмыс сапары барысында елді мекенге кіре берістен бастап, ауылдың ішіне толықтай тазалық жұмыстарын жүргізуді міндеттеді. Бұдан өзге аталмыш ауылдағы клуб үйінің жылыту жүйесін қайта қарастырып, жөндеу шараларын жүргізу туралы ұсыныс енгізу керектігіне баса тоқталды.

Ал, мал дәрігерлік пунктіне жөндеу жұмыстарын жасап, құжаттарын реттеп, теңгерімге алу керек. Және де бұл бағыттағы шараларды жүзеге асыруда уақытты созуға болмайды.

Жалпы, аталмыш ауыл бойынша әлеуметтік ахуал біршама қалыпты. Өзекті дерлік мәселелер жоқ. Әйтседе, ауыл тұрғындарының талап-тілектері алдағы өтетін кездесулер барысында тыңдалынып, ескерілетін болады.

Аудан әкімі Жарқынбек Байсабыров Көкбай ауылдық округіне де атбасын тіреді. Мұндағы мәселе біршама ауқымды екен. Әсіресе, ауыз су төңірегіндегі әңгіме елеулі міндеттемелерге арқау болды. Бұл орайдағы атқарылуы тиіс шараларды аудан әкімі жүйелеп, нақтылап берді. Бірінші кезекте ауылдағы су құбырын қайта жаңғырту жұмыстарын кесте түрінде екі жұмаға жазып бекіту керек. Екіншіден осы мақсатта арнайы комиссия құрып, күнделікті жұмыстардың орындалу барысы туралы жан-жақты түрде дәйекті ақпарат ұсынылуы тиіс. Округ аумағын сумен қамту жұмысы қараша айының 20-сына дейінгі мезгіл ішінде аяқтау жүктелді.

Сонымен қатар, Жарқынбек Борашұлы атап өткендей, Көкбай аулындағы су құбырын қайта жаңғырту жұмыстарына «Дерикар» ЖШС-мен келісім шарт жасасып, қосымша техникалар жұмылдыруды қарастыру да тиімді істер қатарына жатады.

Сондай-ақ, Көкбай ауылындағы мәдениет үйінің хал-ахуалы да аудан басшысы назарына ілікті. Мәселен, мәдениет үйінің тоқ пешін (электрокотел) ауыстыру жөнінде ұсыныс енгізу, ғимараттың төбесінен су аққан жерлерін дұрыстау жұмыстары кезек күттірмейді.

Бір бұл емес, Көкбай атындағы орта мектебінің ескі жылыту қазандығы орналасқан ғимарат материалдарын ауылдың өрт сөндіру пунктіне беру туралы да мәселе көтерілді. Білім ордасы қызметімен танысқан аудан әкімі құзырлы орындарға мектеп жанындағы интернаттағы тамақтандыру мәселесін қадағалауды тапсырды.

Бұдан өзге жаңа әкім Жарқынбек Борашұлы ауданымыздағы Қасқабұлақ ауылдық округінде де болып, елді мекеннің тыныс-тіршілігімен, ауыл өмірін жандандырушы әлеуметтік орындар қызметімен танысты. Бұл ауылдағы атқарылуы тиіс мәселелер қатарына М.Әуезов атындағы орта мектебіне сапалы көмірдің түсірілуін қамтамасыз ету, ауыл шетінде орналасқан мал бордақылау алаңына жасалған құрылыс жұмыстары бойынша қабылдап алынған құжаттарды аудан әкімдігіне өткізу, мал дәрігерлік пункт орналасқан ғимаратты «Қасқабұлақ» ЖШС-нен сатып алып, құжаттарын реттеп теңгерімге алдыртуды ұйымдастыру істері жатқызылды.

Мұнымен қатар, аудан басшысы Жарқынбек Байсабыров Кеңгірбай би ауылдық округінде де болып, мәдени, әлеуметтік бағыттағы жүзеге асқан шаралармен қатар алдағы уақыттарда орындалуы тиіс жұмыстар легін де аудандық әкімдік басшыларымен бірге пысықтады. Жұмыс сапары барысында айқындалғандай, ауылдықтар тарапынан елеулі мәселелер көтерілді. Атап айтсақ, «Абай колледжінде» оқытылатын туризм мамандығына аудан бойынша сұраныс аз болғандықтан ауданға қажетті мамандықтарды қайта қарастыру керектігі жан-жақты сөз болды.

Қорыта айтқанда, аудан әкімі Жарқынбек Байсабыров ауылдық округтерге жасаған осынау сапарымен аудан орталығындағы әлеуметтік нысандарды аралау барысында таяу аралықта жүзеге асырылуы тиіс қысқамерзімді бірқатар шараларды нақтылады. Бұл тек атқарылар жұмыстардың бір парасы ғана. Ал тұтастай алғанда ауданның экономикасын еселеп, әлеуетін арттырар мақсатты еңбек Елбасы Жолдауы мен бағдарламалық мақалаларының  басымдықтары аясында нақты іске аса береді деп сенеміз.  

 Нұржан БАЙТӨС,

«Абай елі»

 

Дүйсенбі, 20 Қараша 2017 00:00

АБАЙ ЕЛІНДЕ ЖАҢА ӘКІМ

Тағайындау

 Абай еліне жаңа әкім тағайындалды. ШҚО әкімі Даниал Ахметовтың өкімімен аудан әкімі қызметіне мемлекеттік қызметте мол тәжірибесі бар Жарқынбек Байсабыров тағайындалды. Ж.Борашұлы осыған дейін облысымызға қарасты Үржар ауданы әкімінің орынбасары қызметін атқарған болатын.

Жаңадан тағайындалған басшыны аудан активіне облыс әкімінің бірінші орынбасары Нұрымбет Сақтағанов арнайы келіп таныстырды.

Айта кетелік, Жарқынбек Борашұлы 1969 жылы Үржар ауданы «Бірінші май» ауылында өмірге келген. 1992 жылы Семей зоотехникалық-ветеринар институтын «мал дәрігері» мамандығы бойынша тәмамдаса, 2008 жылы М.Әуезов атындағы Семей университетін «Экономика» маманы біліктілігі бойынша бітіріп шыққан.

Алғашқы еңбек жолын 1992 жылы «Бірінші май» ауылында Калинин атындағы колхозда санитарлық-емдеу пунктінде меңгеруші қызметінен бастады. Кейіннен бірнеше жыл бойы «1 Май» ЖШС меңгерушісі болды. Ал, 1998-2004 жылдары аралығында «Ерасыл» шаруа қожалығын басқарса, соңынан Үржар ауданының Некрасов ауылдық округінің әкімі болып еңбек етті. Ал, 2006 жылдың қыркүйегінен бастап Жоғарғы Егінсу ауылдық округі әкімі лауазымына тағайындалды. Осыдан соң 2008 жылдан бастап осы күнге дейін Үржар ауданы әкімінің орынбасары міндетін абыроймен атқарды.

Ауыл шаруашылығы саласын дамытуға сіңірген еңбектері үшін әр жылдарда бірқатар мемлекеттік наградалар мен Құрмет грамоталарын алған. Тоқтала кетсек, «Ауыл шаруашылығы саласының үздігі» төсбелгісі мен ІІІ дәрежелі «Еңбек даңқы» белгісінің иегері атанған.

Мемлекеттік қызмет саласындағы озық тәжірибесі, тек жетістіктерден тұратын еңбек өтілі мол Жарқынбек Борашұлы Абай елінің де игілігі жолында абыройлы қызмет атқарады деп сенеміз.

 «Абай елі» ақпараты 

 

Күлкі базары

 

Аудандық жайдарманшылар жазғы демалыстан оралды. Осылайша алғашқы лига ойындарын да өткізді. Қазанның 15-і күні өткен бұл жолғы ойында жастар жаңа бағдарламамен келіп, көрерменге көл-көсір күлкі сыйлады.

Айта кету орынды, бұл жолғы ойын түрі де өзгеше орын алды. Себебі, жайдарманшылар таныстыру бөлімінде өз командаларын өлең түрінде не болмаса әуенмен көрсетуі шарт болды. Сонымен қатар, «Триатлон» бөлімінде ойыншылар бір-біріне әр қилы сауалдар қойып, қазылар алқасы берген тапсырмаларды орындап және тапқырлық пен әзілге құрылған жауаптарын ортаға салынды. Ел жаңалықтарынан да әдемі әзілге астар етіп көрермен қауымның ризашылығына бөленді.

Жайдарманның бұл жолғы ойындарында Қарауыл ауылдық округінің әкімі Мейіржан Смағұлов қазылар алқасына төрағалық етті. Ал, «Абай елі» аудандық қоғамдық-саяси газетінің Бас редакторы Нұржан Байтөс және алқа құрамына жаңадан қосылған «КМФ» банкінің маманы, көпшілікке Жайдарман ойындары арқылы танылған белгілі жайдарманшы  Мейіржан Белібаев, «Қаламқас» халық ән-би ансамблінің мүшесі, «Жастар мәслихатының» депутаты Жаннұр Төлеубаева, «Нұр Отан» партиясының аудандық филиалының маманы Арнұр Амангелдин төрелік жасады.

Жартылай финалда 6 құрама команда өнер көрсетті. Олардың ішінде кілең бастауыш сыныптың буынынан құралған «Жидебай жидектері» ұпай саны бойынша І орынды иеленсе, тоқтамыстық «Үш гүлдің бір сабағы» ІІ орыннан көрінді. Ал, М.Төлебаев атындағы Семей музыкалық колледжінің «Өнер» құрама командасы  мен Семей геологиялық-барлау колледжінің студенттерінен құралған «Джентельмен» командалары да финалға жолдама алды. Тек Абай мектеп-лицейінің «Атамекен» құрама командасы мен гимназиялық өрендер «Голливуд» құрамасы бұл жолғы ойында аз ұпай жинап, жартылай финал шеңберінен шығып қалды.

Жастардан алдағы уақыттарда да әдемі әзіл, тапқырлыққа құрылған тамаша ойындар күтеміз.

Күлкі кеші бітісімен ғаламтор желісіне салынған аудандық Жайдарман ойындары республика көлемінде кең тарап, жоғары бағаға ие болған. Желі арқылы тараған көңілді ойындармен сүйінші хабар қатар келген болатын. Оның ішінде жас та болса өнерімен дараланған "Жидебай жидектері" құрама командасы 20 қазанда Астана қаласында өткен республикалық  “Жайдарлы  Жас Ұлан” жайдарман ойындарының финалына арнайы шақырту алыпты. Жас буынның жетістігін өз көзімен көріп қайтқан аудандық "Жастар орталығының" директоры Сырым Жұмағали:

         - Республика бойынша маусымашар және облыстың жеңімпаздарынан іріктеліп  15 команда қатысты. Соның ішінде Абай ауданы Қарауыл ауылынан “Жидебай жидектері” командасы өнер көрсетіп, ҚазМедиа орталығындағы "Балапан" телеарнасының арнайы түсіріліміне қатысып қайтты-, деп атап өтті.

         Аудан көрермендерінің ғана емес, республиканың көзайымына айналған Абай ауданы жайдарман лигасының фавориттері  “Жидебай жидектері” командасына үлкен сахналарды бағындыра беруіне біз де зор тілектестік білдіреміз.

 

«Абай елі» ақпараты

 

 

Қазан айының басында аудандық орталық стадионда жылдағы дәстүрге айналған спорт додасы тағы да өз жалауын көтерді. Абай ауданы әкімінің жүлдесі үшін ұйымдастырылған спартакиада ұлы жазушы, қазақ әдебиетінің классигі  Мұхтар Әуезовтің 120 жылдығына арналды.

Жыл сайын аудандық мәдениет, тілдерді дамыту, спорт және дене шынықтыру бөлімінің ұйымдастыруымен өтетеін бұл шараға қатысушылар спорттың   7 түрінен, атап айтсақ, жеңіл атлетика, үстел теннисі, дойбы, тоғызқұмалақ, шахмат, гір көтеру, қол күресі сынды жарыс түрлеріне қатысып, бақ сынасты. Таңертеңнен бастау алған спорттық бәсекеге барлығы 9 ауылдық округтен «спорт десе, ішкен асын жерге қоятын» белсенділер бас қосып, сынға түсті.

Аудандық спартакиаданың ашылу салтанатында сөз алған аудан әкімінің  міндетін атқарушы Бауыржан Болатұлы  сөз кезегінде спортшыларымызға  өз өнерлерімен ел мәртебесін көтере берсін деген ізгі лебізін білдіріп, жарысқа қатысушы спортшыларға сәттілік тілеп, спартакиаданы ашық деп жариялады. Бұдан кейін әуелете Әнұран шырқалып, спартакиаданың шымылдығы түрілді.

Әрбір спорттық ойын көрермендердің қызу қолдауы мен ризашылықтарына толы болған шараға барлық ауылдық округтерден белсенді жастар жиналыпты.

Логикалық және  математикалық ойлауды дамытатын Тоғызқұмалақ сайысында  І орын - Оралханов Б, Құралбекова А, Кеңеспекова А (Қарауыл) ІІ орын- Маратқызы.Ж, Айдынқызы.Л, Уалитов.Е  (Тоқтамыс)  ІІІ орын  Нұрсұлтанов А, Зарыққанұлы Ж, Ақшекина Г (Кеңгірбай би)

Жеңіл атлетика сайысында   (100 м қыздар арасында)  І орын -Дәкенова Әйгерім (Қарауыл),  ІІ орын -Қуандықова Анар (Медеу)  ІІІ орын -Мақсұнова Динара (Кеңгірбай би)   (100 м ұлдар арасында) І орын  - Мамажаев Сырым (Қарауыл)  ІІ орын-Санияров Табиғат (Тоқтамыс)ІІІ орын -Манарбекұлы Ж (Көкбай)     (2400 м қыздар арасында) І орын Бопабаева Карина (Құндызды),  ІІ орын- Асқарқызы Эльмира (Архат),  ІІІ орын Болатқазы Маздақ (Көкбай)   (2400 м ұлдар арасында) І орын -Ерланұлы Ерсін (Саржал),  ІІ орын- Нұрланов Ақжол (Құндызды), ІІІ орын-Құсманов Заңғар (Кеңгірбай би)

Ұзындыққа секіру қыздар арасында І орын -Қуандықова Анар  (Медеу), ІІ орын - Болатқазы Маздақ (Көкбай), ІІІ орын -Қалиасқарова Мейрамгүл (Қасқабұлақ)

Ұзындыққа секіру ұлдар арасында  І орын -Мамажаев Сырым (Қарауыл),ІІ орын -Санияров Табиғат (Тоқтамыс),ІІІ орын- Жумағалиев Мұрат (Саржал)

Аралас эстафета 4х100м бойынша

І орын Мамажаев С,  Жармұханбетов Е,  Дакенова А, Мағат  М  (Қарауыл ауылы)  ІІ орын Манарбекұлы Ж, Физулиев Ж, Бауыржанқызы А, Болатқазы М.  (Көкбай ауылы)    ІІІ орын - Советова М, Қуаныш Е,  Сайлаубекқызы М, Санияров Т (Тоқтамыс ауылы)

Үстел теннисі  І орын  -   Әкманов Ж, Ризанова З  (Қасқабұлақ ауылы)  ІІ орын -Жарасбаев Қ, Сайлаубекова Б  (Кеңгірбай би ауылы)   ІІІ орын - Есімханов Ж, Берікқанова Б   (Құндызды ауылы)

Дойбы сайысында

І орын   - Әзімжанов А,   Айдарханова А  (Архат ауылы),  ІІ орын - Саржанов Р, Жаукенова Б  (Құндызды ауылы),  ІІІ орын  - Үркімбай А,

Кәріпбаева Б  (Кеңгірбай би ауылы)

Шахмат сайысында   І орын -  Жолдасханов.М, Тұрсынханова.З  (Кеңгірбай би ауылы)  ІІ орын - Баймусин М,  Керибаева А  (Көкбай ауылы)   ІІІ орын -   Әкімбергенов.И, Кәкімова.Ж    (Қарауыл )   

Гір көтеру  (70 кг дейінгі салмақта)

І орын - Сембаев Е (Саржал ауылы),ІІ орын -Советқадыров А (Көкбай ауылы)  ІІІ орын -Хамитұлы Н (Кеңгірбай би ауылы)

(70 кг кейінгі салмақта)

І орын  Айтбаев Р  (Қасқабұлақ ауылы),  ІІ орын -Арқашев Ж (Кеңгірбай би ауылы),  ІІІ орын -Үркімбаев А (Құндызды ауылы)

Армрестлинг (қол күрес) бойынша

Ерлер арасында   (70 кг дейінгі салмақта)І орын -Қалиолин А (Тоқтамыс) ІІ орын - Ақбердинов М (Құндызды)  ІІІ орын  - Хамитұлы Н (Кеңгірбай би)

(70 кг кейінгі салмақта)

І орын-   Айтбаев Р (Қасқабұлақ)  ІІ орын -Асқарұлы Д (Құндызды) ІІІ орын -Үйсімбаев Р (Кеңгірбай би)

Әйелдер арасында

(65 кг дейінгі салмақта)

І орын -Қабидоллина Ә (Кеңгірбай би)  ІІ орын - Айтпенбетова Г (Құндызды)  ІІІ орын -Ермекбаева Н (Қасқабұлақ)

(65 кг кейінгі салмақта)

І орын-  Ризанова З (Қасқабұлақ)  ІІ орын - Ығылманова Қ  (Көкбай) ІІІ орын - Берікбекқызы А (Кеңгірбай би)

Сонымен, таңертеңнен бастау алған Мұхтар Әуезовтің 120 жылдығына арналған Абай ауданы әкімінің жүлдесі үшін өткен аудандық спартакиаданың жалпы қорытындысы бойынша спартакиаданың  І орын -Кеңгірбай би ауылы,  ІІ орын -Көкбай ауылы,  ІІІ орын-Қарауыл ауылы, Қасқабұлақ ауылы, IV орын-Архат ауылы, V орын- Құндызды ауылы, VI орын - Саржал ауылы, VII орын- Медеу ауылы, VIII орынға- Тоқтамыс ауылының спортшылары лайық деп танылды.

Жарыстың жабылу салтанаты аудандық спорт мектебінде өтіп, барлық жарыс түрлерінің жеңімпаздарына мадақтамалар мен медальдар табыс етілді. Бұл жеңістер спортшыларымыздың өзіне деген сенімін арттыратыны сөзсіз.

 Тоғжан Қалымова

"Абай елі"

Page 1 of 29

Біз туралы

Бас редактор: Байтусов Нуржан Мейзханович   

Тілшілер:  Сарсенбина Анар Қабдуалиқызы

Тілшілер: Рақымбекқызы Тоғжан 

Компьютерде теруші: Дукенбаева Баян 

 

 

Сайт материалдарымызды пайдаланғанда дереккөзге сілтеме көрсету міндетті.

Авторлар пікірі мен редакция көзқарасы сәйкес келе бермеуі мүмкін.

Жарнама мен хабарландырулардың мазмұнына жарнама беруші жауапты.

Соңғы жаңалықтар