Бірлігіміз жарасқан
Салтанатты кеш
Тәуелсіздік халқымызға оңайлықпен келген жоқ. Осынау ұлы жолда кешегі кең байтақ ұлан-ғайыр атыраптағы шашыраған ұлтымыздың басын біріктіріп, бір арнаға тоғыстырып, азат ел болуды көздеген Абылай ханның, қаймана қазағын қара өлеңмен оятқан алаш зиялылары мен желтоқсанның ызғарына тоңбастан егемендік үшін жанын құрбан еткен боздақтардың жазықсыз төгілген қаны бар. Сан мәрте күрестің нәтижесінде қазақ деген ұлт қалыптасты, Тәуелсіз мемлекет кереге тіктеді. Біз үшін дәл осы қастерлі күн ерекше қайталанбас мерекеге айналды. Осыдан тұп тура жиырма бес жыл бұрын 16 желтоқсанда Қазақстан Республикасы өзінің дербес мемлекет екендігін жариялады. Осы күннің ақ таңын көру бүгінгі ұрпақтың бағына бұйырды.
Бүгінде егеменді ел ретінде бой түзеп, Отанымыздың шекарасын шегендеп, ұлттық құндылықтарымызды бүтіндеп, төл рәміздерін қалыптастырған, құқықтық заңдарын бекіткен мығым мемлекеттің іргетасы қаланды.
Тәуелсіздік таңының арайлап атқанына бүгінде ширек ғасыр толып отыр. Осынау қастерлі күн елімізде айшықты деңгейде аталып өтуде. Береке-бірлігі жарасқан, сәні мен салтанаты келіскен Абай елі де елдік мерекені айшықты мәнде қарсы алуда. Жыл басынан бастау алған шаралар легі «25 жылға 25 жұлдызды күн» атты сан-салалы тақырыпты қамтыған тағылымды мезеттермен толығуда.
Желтоқсан айының 12 жұлдызында аудандық Мәдениет үйінде «Тәуелсіздік - Мәңгілік ел мұраты» атты салтанатты кеш ұйымдастырылып, жиында табанды қызметтерімен танылған ел ағалары, жылдың үздік мамандары марапатталып, мерейге бөленді. Салтанатты басқосуда сонау елорда төрінен келген мәртебелі меймандар Қазақстан Республикасы денсаулық сақтау және әлеуметтік даму министрлігі ішкі әкімшілік департаментінің директоры Безлер Владимир Михайлович, облыстық денсаулық сақтау басқармасы басшысының орынбасары Сафиоллинова Райфа Сафиоллақызы болды. Сонымен қатар, аудан әкімі Тұрсынғазы Мүсәпірбеков бастаған басшылар мен мекеме, бөлім жетекшілері, ауыл әкімдері, мектеп директорлары, аудан жұртшылығы қатысты. Кеш шымылдығын құттықтау сөзбен ашқан аудан әкімі Тұрсынғазы Жантұяқұлы 25 жылда жеткен жетістіктерге кеңінен тоқталып, жемісті істер жайында айтып өтті.
-Ержүрек бабалардың, ақжүрек аналардың аңсап күткен арман тілегі – Қазақстан Республикасы Тәуелсіздігінің 25 жылдық мерекесімен шын жүректен құттықтаймын! Қыран ұшса қанаты талатын, құлан жортса тұяғы тозатын шетсіз-шексіз байтақ өлкемізге Тәуелсіздік өздігінен келген жоқ. Қазақ халқының әулеті асып, дәулеті тасыған дәурені де бар, басынан бағы тайып, тар заманға тап болған қилы кезеңі де көп. Сол сияқты «мың өліп, мың тірілген» халқымызға армандаған азаттық таңы талықсып барып жетті, бұл жолда талай қан төгіліп, жас боздақтар қыршыннан қиылып, шейіт болды. Тәуелсіздігіміз тұғырлы болуы үшін өткенімізге тәу етіп, бүгінгімізді саралап-салмақтап, келешегімізді бағдарлай алуымыз керек. Сонда біздің тік көтерген шаңырағымызды ешкім де шайқалта алмайды, іргеміз берік болады, - деп атап өткен аудан басшысы баяндамасын 25 жылдық белестегі Абай елінің мерейімен де сабақтады.
Атап айтсақ, абайлықтар үшін ең құнды байлық - ел Тәуелсіздігімен бірге түлеген дана Абай мен Шәкәрім мұраларының қайта жаңғыруын, ғасыр кесапаты – Семей ядролық сынақ атом полигонының тоқтатылуын және де азаттық жолындағы Алаш арыстарының абыройлы істерінің ақталып, халқымен қайта қауышуын сөзіне тиек етті. Осылайша ауданымыздың әлеуметтік-экономикалық дамуына қысқаша тоқталып өтті.
Кеңес үкіметі кезіндегі ауданымызда өрістеген мал санына бүгінде тек қой саны жетіп қалғандығы, ал, қазіргі таңда сол дәуірмен салыстырғанда мүйізді ірі қара саны 11,5 есеге, жылқы саны 3 есеге жуық артып отырғандығы бұл саланың қалыпты дамып келе жатқандығын көрсетеді. 1991 жылы аудандағы кеңшарлар мен ұжымдарда мүйізді ірі қара 4450 бас болса, 51291 басқа, яғни 11,5 есеге өсті. Жылқы түлігі 11326 бас болса, қазіргі уақытта 31972 басқа артып, үш есеге жуық өсті. Тәуелсіздік жылдары аудан бойынша жаңадан үш мектеп, бес балабақша ашылды. Спорт саласы бойынша бір спорт модулі, «Шыңғыстау» спорт кешені, бір мектеп жанындағы спортзал салынды. Барлық ауылдарда жаңадан футбол алаңдары, хоккей кордтары пайдалануға берілді. Медицина саласы бойынша жаңадан бір дәрігерлік амбулатория салынса, аудандық емхана, поликлиника ғимараты және барлық ауылдық дәрігерлік амбулаторияларға күрделі жөндеу жұмыстары жүргізілгендігін жеткізген аудан басшысы өнер, спорт, білімде жеткен жетістіктерді де жіктеп берді.
Бір кездері тек аудан орталығы мен Медеу ауылдық округінде ғана болған мәдениет ошақтары қазір барлық ауылдық округтерде қамтылған. Бүгінгі таңда тозығы жеткен ғимарттар жаңартылып, заманауи үлгіде қолданысқа енгізілген. Мәселен, орталық кітапхана, өлкетану мұражайы, Жидебайдағы Абай музейі күрделі жөндеуден өтіп, «Қызмет көрсету кешені» іске қосылды. Мұнан бөлек Қарауыл мен өзге ауылдардағы негізгі көшелер асфальтталып, жарықтандырылды. Ауылдық саябақтар қайта жасақталып, алты балалар саябағы, Мамай батыр, Әнет баба, «Еңбек аллеясы» парктері ашылып, Жеңіс саябақтары қайта жаңғыртылды. Барлық ауылдарда мобильді байланыс іске қосылып, бірқатар ауылдар интернет желілерімен қамтамасыз етілген.
Осынау атқарылған ауқымды еңбек өз деңгейінде бағалануда. Оған дәлел ретінде білім саласында, өнерде, спортта үздік еңбек еткен қызметкерлердің жыл сайын үкіметтік марапаттарға ие болуын айтсақ жеткілікті. Тұрақтылықтың арқасында тегеурінді табыстарға қол жеткізген ауданымыз мемлекеттік бағдарламаларды да жүйелі жүргізіп келеді. Осылайша, ауданымыздың ширек ғасыр ішіндегі ауыз толтырып айтарлықтай айқын істеріне көз жеткізген көпшілік көңілі бір демделіп қалды.
Өз кезегінде сөз алған Қазақстан Республикасы денсаулық сақтау және әлеуметтік даму министрлігі ішкі әкімшілік департаментінің директоры Безлер Владимир Михайлович қазақы үрдістің қаймағы бұзылмаған өңірі абайлық қауымды қазақша құттықтап, ілтипатын білдірді.
Осыдан соң мерекелік шара барысы жылдық қорытындыға негізделген мерейлі марапаттар кезегіне берілді. Бұл орайда хакім Абайдың сөзімен айтсақ, «ыстық қайрат, нұрлы ақыл, жылы жүрек» иелері атанған бірқатар жерлестеріміз еселі еңбек, жігерлі қызметтері нәтижесінде абыройлары асқақтады. «Қазақстан Республикасы Тәуелсіздігіне 25 жыл» мерекелік медалімен: Жағыпар Жүнісжанов, Амантай Мұқатаев, Марат Түңлікбаев, Ерлан Лдибаев, Гүлнар Боранжанова, Тұрар Көзбаева, Амангелді Жікенов, Жарқын Жаукенов, Асқар Мұқатаевтар марапатталды.
Ал Қазақстан Республикасы мәдениет және спорт министрлігінің «Құрметті спорт қызметкері» төсбелгісін Қуат Қалиев, Назым Күзембай, Ұлан Жанболат өңірлеріне тағып, арнайы куәлік иегерлері атанды. Сонымен қатар, ерекше сезімге толы осынау сәттерде Қазақстан Республикасы мәдениет және спорт министрлігінің «Мәдениет саласының үздігі» төсбелгісімен Темірова Рыскен, Имашева Армангүл,Төлемісова Нұргүл, Сәрсенбаева Дана марапатталып, жерлестері алдында мерейлері асқақтады.
Ал полиция майоры Әзіхан Қазбек Нұрисламұлы Шығыс Қазақстан облысының ішкі істер департаментінің Грамотасына ие болса, ауданның мәдениет саласының дамуына қосқан ерекше үлесі үшін еңбек ардагері Қапсаламұлы Шайқсләм аудан әкімінің Грамотасымен марапатталды.
Марапаттар кезегі мұнымен толас тапқан жоқ. Салтанатты жиынның шарықтау сәтінде жылдағы дәстүрмен жылды үздік қорытындылаған сала мамандары да құрметтелді. «Жыл үздігі - 2016» номинациясы бойынша ауылшаруашылығы саласының үздігі - Балтабаев Рысқали («Жаңабай» шаруа қожалығының жетекшісі), «Үздік ауыл әкімі» - Садырбай Ақылтай (Тоқтамыс ауылдық округінің әкімі), «Медицина саласының үздігі» – Мұхамеджанова Шолпан (орталық аудандық аурухана бас дәрігерінің орынбасары), «Үздік кәсіпкер» – Әкімбаев Сәлім («Жарылғасын» шаруа қожалығының жетекшісі, Саржал ауылы), «Үздік мемлекеттік қызметкер» – Сағындықова Нұргүл (аудан әкімі аппаратының бөлім басшысы), «Үздік полиция қызметкері» – Мұқанов Айбек (жергілікті полиция қызметінің Саржал ауылы бойынша учаскелік полиция инспекторы-полиция капитаны), «Білім саласының үздігі» – Қарақабаева Мадина («Балдәурен» ясли-балабақшасының директоры), «Мәдениет саласының үздігі» – Төлендиев Ерқанат (Құндызды клуб үйінің меңгерушісі) атанды.
Расында еңбегімен мерейлі абайлықтар қатары жетерлік екен. Бұл тізім қатарын толықтырғандар легіне тоқталар болсақ, «Үздік спорт маманы» – Әділханов Серік (Шәкәрім орта мектебінің дене шынықтыру пәнінің мұғалімі), «Жалынды жас» – Амангелдин Арнұр (Абай аудандық Жастар орталығының әдіскері) марапатталды.
Мұнымен қатар, аудан әкімінің Алғыс хатын иеленген сала қызметкерлері де көпшілік алдында құрметке бөленді. Слямбекова Фурхад, Нұғымбаева Нұрбек, Жеделғазина Бақтыгүл, Байжұманов Марат, Тәліпов Арман, Маратұлы Думан, Жәкішбекова Нұрсұлу, Смаилова Совет, Өкімханова Еңлік, Мұсаханов Елдар мерейге кенелді.
Көңіл толқытқан салтанатты жиында Мемлекеттік қызметке алғаш қабылданған азаматтар ресми түрде ант қабылдап, қызметте адал болатындықтарына серт берді. Олардың қатарында кәсіпкерлік және ауыл шаруашылығы бөлімінің бас маманы болып Сағынбаев Тілек, Тоқтамыс ауылдық округі әкімі аппаратының бас маманы Закариянов Мерей, мәдениет, тілдерді дамыту, дене шынықтыру және спорт бөлімінің жетекші маманы қызметіне Қайроллаев Әсет қабылданды. Бұл қайталанбас сәт жас мамандардың жадында осынау мерейлі күннен естелік болып мәңгілікке сақталып қалатыны анық.
Тәуелсіздікке арналған әсерлі кеш «Қаламқас» халық ән-би ансамбілінің мерекелік концерттік бағдарламасымен тәмамдалды. Әсіресе, патриоттық тақырыптағы әндер шарықтаған шара барысында әйгілі абайлық сахна саңлақтары өнер көрсетті.
- S. Осы ширек ғасыр ішінде елімізді айтпағанда, талай белестерді бағындырған ауданымыздың көркею жолындағы кемел істеріне кеш барысында айқын көз жеткізгендей болдық. Елдігіміз айшықталып, ұлттық салт-дәстүрімізді жандандырдық. Бұл жолда әлбетте жерлестеріміздің қосқан қомақты үлесі, төккен маңдай тері жатыр. Енді осы асылдарымызды бағалап, оларды қастерлеу ұрпақтарға жүктелетін ұлы міндет. Іргетасы берік қаланған мемлекетіміздің шаңырағы шайқалмай, тұғырлы Тәуелсіздігіміз мәңгілік болғай!
Тоғжан Рахымбекқызы,
«Абай елі»
Сәуір айының 26 күні Қарауыл ауылында аймақтағы белсенді жастардың басын қосқан іргелі жиын өтті. Атап айтсақ, «Нұр Отан» партиясының «Жастар Отанға» жобасы аясында ел Тәуелсіздігінің 25 жылдығына арналған «Нұрлы Болашақ жастары» атты тақырыпта облыстық форум ұйымдастырылды. Форумға «Нұр Отан» партиясының облыстық филиалы төрағасының бірінші орынбасары Әнуарбек Мұхтарханов, Абай ауданының әкімі, «Нұр Отан» партиясы аудандық филиалының төрағасы Тұрсынғазы Мүсәпірбеков, «Жас Отан» жастар қанатының Шығыс Қазақстан облыстық филиалының төрайымы Маржан Бахыт, облыстық «Жастар орталығының» басшысы Арайлым Керімбекқызы, ШҚО «Жасыл ел» жасақтары штабының жетекшісі Қуаныш Қасенов және аймағымыздағы аудандық жастар орталықтарының басшылары қатысты.
Еліміздің бүгінгі жастары үшін нағыз қайрат танытар шақ туды. Жаңа жағдайда, заманауи мемлекеттің сындарлы саясаты арқасында әлемдік деңгейдегі білім мен білікті игеріп, келешектің кілтін қолға алу міндеті күн өткен сайын артып келеді. Елбасы, Нұрсұлтан Назарбаев өз Жолдауында: «Мен сіздер, бүгінгі жастар, ерекше ұрпақ екендеріңізді қайталаудан жалықпаймын. Сіздер Тәуелсіз Қазақстанда өмірге келдіңіздер және сонда ер жетіп келесіздер. Сіздердің жастық шақтарыңыздың уақыты – біздің еліміздің көтерілу және гүлдену уақыты. Сіздер осы жетістіктер рухын және табысқа деген ұмтылушылықты бойларыңызға сіңірдіңіздер», - деп баса мән берген болатын. Қазіргі күні жастар қоғамдағы қозғаушы күшке айналды. Мұның себебі де бар, Елбасы жастар саясатына үлкен маңыз беру керектігін міндеттеген болатын. Сондай-ақ, жастармен нақты жұмыс істеудің үлгісін көрсетті.
Өскелең буынды ұлтжандылыққа, отансүйгіштікке, патриотизмге баулып жүрген «Нұр Отан» партиясының, «Жас Отан» жастар қанатының, «Жасыл ел» жасақтарының және жер-жерлердегі жастар орталықтарының өткізіп жатқан іс-шаралары кемел елдің келешегі үшін маңызды екені анық. Осы тұрғыда ауданымыздағы Жастар орталығының да атқарып жатқан жұмыстары айтарлықтай. Талапты жас Мейіржан Смағұлов басқаратын бұл қоғамдық бірлестік бүгінде толайым табыстарға қол жеткізген. Жыл басынан бері сан түрлі байрақты бәсекелерде топ жарған өрендердің жетістіктері осының дәлелі. Ал облыстық форумның ауданымызда өтуі олардың мерейін тіптен еселеуде.
Ауданымызға ат басын тіреген форум қатысушылары ең әуелі Еуразия кіндігі Жидебайдағы Абай мен Шәкәрім қажы кесенелерін зиярат етті. Шығыстың ең белсенді жастары одан соң Абай мұражайын аралап, халыққа қызмет көрсету орнындағы мәжіліс залында форум бағдарламасымен танысты. Осыдан соң Қарауыл ауылына жол тартып, «Жастар үйі» ғимаратымен, атқарып жатқан жетістікті қызметімен танысты. Мұнда ауданымыздың спорт, өнер, білім салалары бойынша ең үздік жастары сап құрып, қонақтарға қошемет білдіріп қарсы алды.
Осыдан соң барлық форумға қатысушылар Қазақстан Республикасының Туы мен «Нұр Отан» партиясының байрағын желбіреткен 15 ақ түсті көліктермен шеру жасады. Көліктер шеруі әуелі Абай ескерткішіне аялдап, делегация мүшелері гүл шоқтарын қойды. Одан кейін жастар Тәуелсіздік монументіне ат басын бұрды.
Бұл жерде аял жасаған форум қатысушылары жергілікті жастар лебізіне құлақ түрді. Аудандық жастар ісінің белсендісі, «Абай елі» газетінің бас редакторы Нұржан Байтөс жалынды сөз сөйлесе, «Мерғали Ибраев» атындағы ақындар сыныбының Хамида Сәметова мен Зарина Оралқызы сынды оқушылары өздерінің отты да жүрек жарды туындарын оқып, көпшілікті жігерлендіре білді.
Осылайша әуеге бейбітшіліктің символындай аппақ көгершіндер ұшырылып, аудан әкімі Тұрсынғазы Жантұяқұлы мен «Нұр Отан» партиясының ШҚОФ бірінші орынбасары Әнуарбек Мұхаметжановтың бастауымен Тәуелсіздік монументіне гүл шоқтары қойылған бұл сәт форумға қатысушылардың есінде мәңгі қалары сөзсіз.
Бұл күні Шыңғыстау өлкесінің аспаны жастардың жалынды ұрандарымен жаңғырды. Қазақстандық патриотизмді ту еткен жастар Мамай саябағына бет алды. Жаугершілік заманда Тобықты елінің туын көтерген бәһадүрге арналған еңселі ескерткіш өткен жылы мүсінделіп, Ұлы Абайдың 170 жылдық мерейтойы қарсаңында тұғырға қонған болатын. Биыл осы саябақты абаттандыру жұмыстары жүйелі қолға алынуда. «Атадан мал қалғанша, тал қалсын» дейтін халқымыздың даналық сөзін ұлылар мекені де ұран етіп келеді. Жас шыбыққа жиі теңелетін жастар үшін де бұл үлкен өнегелі іс. «Жасыл ел» жасақтары үшін жұмыс маусымының дәл ашылар уақытына тұспа-тұс келіп отырған форум осынысымен де ерекшеленді десек артық айтқандық емес. Мамай батыр алаңына жиылған 500-ден астам жас осы күні аталмыш саябаққа 70 түп шырша көшеттерін отырғызды. Игілікті шараны облыс орталығынан келген қонақтар мен аудан басшылары бастап, жастар қауымы да қоларына күрек алып ел ағаларының ісін жалғады.
Ағаш отырғызу сәтінен кейін форум қатысушылары «Шыңғыстау» спорт кешенімен танысты. Арнайы бокс залы, күрес, самбо, дзю-до залдары, фитнес залы мен тоғызқұмалақшылар бөлімі аудан қонақтарының көңілінен шықты. Бұдан кейін меймандар аудандық мәдениет үйіне ат басын бұрды. Ол жерде алқызыл жолмен жүріп өткен қонақтарды, жергілікті тұрғындар қошеметтеді. Сондай-ақ әр салада республикалық, халықаралық жетістіктерге жеткен жастар да осы жолмен жүріп өтіп, форумға орай ұйымдастырылған баннер алдында БАҚ өкілдері фотосуретке түсірді.
Ал форумның негізгі бөлімі мәдениет үйінде өтті. Іргелі басқосуға қатысушыларға «Қаламқас» халық ән-би ансамблінің мүшелері, ҚР мәдениет саласының үздіктері Жанат Хайсина, Еркін Жолжігітов «Жаса туған жерім!» әнін тарту етті. Форумның салтанатты ашылуында «Нұр Отан» партиясы Шығыс Қазақстан облысы филиалының төрағасының бірінші орынбасары Мұхтарханов Әнуарбек Мұхтарханұлы және Абай ауданының әкімі, «Нұр Отан» партиясы аудандық филиалының төрағасы Мүсәпірбеков Тұрсынғазы Жантұяқұлы құттықтау сөздерін сөйледі.
Мәдени шарада сондай-ақ «Қаламқас» халық ән-би ансамблі өнерпаздарының орындауында «Бірігіңдер-бірігіңдер» атты көне аспаптық шығарма орындалды. Сонымен қатар, «Қазақ елі байтағым» әнін халықаралық фестивальдардың лауреаты, «Қаламқас» халық ән-би ансамблінің мүшесі Нұрбек Өмірбек нақышына келтіре шырқады.
Форумда сөз алғандар қатарында ауданның жігерлі жастары да жалынды сөз сөйлеп, баяндамаларымен таныстырды. Атап айтар болсақ, «Дипломмен ауылға» бағдарламасы аясында нәтижелі еңбек етіп жатқан Абай атындағы мектеп-лицейінің қазақ тілі, әдебиеті пәнінің ұстазыАдибаева Әйгерім, аудан оқушыларының спорттағы жетістіктеріне сүбелі үлес қосып жүрген «Абай ауданы бойынша балалар-жасөспірімдер спорт мектебінің» бапкері, жас спортшы Саят Нұрболат және Абай ауданының жастар орталығының директоры, «Жас Отан» жастар қанатының төрағасы Смағұлов Мейіржан аудан жастарының жетістіктерін паш етті.
Көрермендер көңілін серпілткен жастар да сахна төрінен көрінді. Атап айтсақ, «Жайдарман» ойындарында топ жарып, аудан намысын қорғап жүрген «Жидебай жидектері» жайдарман командасы қалың көпшілікке жарасымды күлкі сыйлады.
Ал аталмыш форумның соңында барлық қатысушылар марапатталып, үздік номинациялар табысталды.
Нұржан БАЙТӨС
"Абай елі"
Қоғамдық шараға белсенді түрде қатысу әр азаматтың бойындағы патриоттық сезімнің, өз елі алдындағы жауапкершіліктің жоғары екендігін айғақтаса керек. Ел игілігі жолында жан аямай еңбек қылатын жандар Абай елінде де баршылық екен. Сәуір айының 19 күні аудандық әкімдіктің мәжіліс залында ҚР Парламенті Мәжілісі мен деңгейлі мәслихаттар депутаттарының сайлауында «Нұр Отан» партиясы үміткерлерін сайлау науқанына белсенді қатысқан бірқатар штаб мүшелері салтанатты түрде марапатталды.
Айта кетейік, саяси науқан алдында ауданымызда да қоғамдық штаб құрылып, үгіт-насихат жұмыстары кесте бойынша жүйелі түрде жүргізілген болатын. Соның нәтижесінде болар, өңіріміз Елбасы төрағалық ететін саяси партияғааса көп мөлшерде дауыс бергендігі де халық жадында.
Әкімдік залындағы алқалы жиынды алғысөзбен ашқан аудан әкімінің орынбасары Марат Еділбаев ең алдымен саяси партияға зор сенім білдірген абайлық қауымға зор алғысын жеткізе келе, ауданымыздың бірқатар азаматтарына «Нұр Отан» партиясының төрағасы Н.Назарбаевтың және партия төрағасының бірінші орынбасары А.Мырзахановтың алғыс хаттарын табыстады.
Атап өтсек, Елбасының марапатына «Нұр Отан» партиясы Абай аудандық филиалы төрағасының бірінші орынбасары, штаб төрағасы Қайырғазы Дүрмекбай, штаб мүшелері Жанұзақов Шалқар,Төкенова Маузира, Белібаев Мейрамбек, Рахымбекқызы Тоғжан, Амангелдин Арнұр, Байшеров Сұлтан, Байжигитова Айгүл, Жанпейсова Айжан, Мұқанқызы Гүлжанат, Балтабеков Болат, Әзімбай Зағипабөленді. Алпартия төрағасының бірінші орынбасары «Алғыс хатымен» Ақылбеков Айдос,Тұрысбеков Талғат, Магденов Ербұлан, Орынбекұлы Нұрлыбек, Қуандықов Аманбек марапатталды. Сондай-ақ жиында сөз алған Қайырғазы Нұрлыбекұлы мерейге бөленген жандарды құттықтай келе, сайлауға ат салысқан мекеме, мектеп басшылары мен ауыл әкімдеріне де ризашылығын жеткізді.
Ел азаматтарының, қала берді ауданымыздың тұрғындарының ауызбіршілігін, ертеңгі күнге деген сенімін айғақтаған саяси шарада белсенділік танытқан жандар қашан да құрметке лайық.
«Абай елі» ақпараты